Ufuna u-R80 million ogwetshelwe u-R40
Umngani wakhe ufele ejele
UFUNA "ukugezwa" wuhulumeni ngo-R80 million owesilisa waseMakhabane, eMtubatuba, ogwini olusenyakatho yeKwaZulu-Natal okume amalungiselelo omshado wakhe, waphelelwa wumsebenzi emuva kokugwetshwa udilikajele yiNkantolo yeMantshi yaseMthatha ngecala athi akalenzanga.
UMnu Mkhulekeleni Thabani Phakathi (33), ugwetshwe yile nkantolo ngowezi-2014 emuva kokulahlwa yicala lokubulala nelokuntshontsha u-R40 endaweni yokucima ukoma - uboshiswe wukuthi umuntu owenze icala ubenze impithi ekhanda.
Nokho kuphelile konke lokho njengoba udaba lwakhe lubuyekeziwe, iNkantolo eNkulu yaseMthatha yamkhipha phambili. Ubehluleka nokuzibamba ngesikhathi ekhuluma naleli phephandaba, elilandisa ngokwenzekile ngesikhathi eboshwa. Uphume ejele ngeledlule kuyimanje uhleli nomndeni wakhe.
Uthi ngesikhathi eboshwa ushiye ingoduso yakhe inezinyanga ezintathu ikhulelwe, uze waqala ukubona indodana yakhe ngeledlule - okumanje iyohlanganisa iminyaka emithathu ingakaze imbone. Utshele ILANGA ukuthi wehlelwe yibhadi ekuqaleni kowezi-2014 esebenzela eMthatha.
“BekuyiSonto ekuseni ngihambisa imoto yami kumakhenikha. Kuthe ngisemgwaqweni owuthelawayeka, imoto yacisha yangabe isafuna ukuduma. Ngiyibuyisele eceleni ngafonela abantu abebe- zongisiza, nebala basheshe bafika. Kuqhamuke imoto yamaphoyisa ngesikhathi sisazama ukuba imoto idonswe siyisa kumakhenikha.
"Aseshe imoto yami angathola lutho angibuza ukuthi bengikuphi ngobusuku bangoMgqibelo futhi bengihamba nobani. Ngiwatshele ukuthi bengihamba nomunye umngani wami engisebenza naye, uMnu Sipho Ngema ogcine eshonele ejele.
"Athe ayangibopha ngoba ngivulelwe icala lokubulala nokuntshontsha u-R40 endaweni yokucima ukoma,” kusho uMnu Phakathi. Uthi njengoba eMthatha ebefike ngokusebenza, ubegoduka njalo uma kuphele inyanga.
Amaphoyisa amthathile ahamba naye ayosesha emqashweni wakhe angathola lutho, abesemqhuba emyisa kuMnu Ngema baboshwa bobabili. “Sihlale ejele sisolwa ngaleli cala kwaze kwaba kufika isikhathi sokuba umngani wami uhlaselwa wukugula washona.
"Ligcine lingigweba icala sengingedwa ngowezi-2016 nga- nikwa udilikajele neminyaka engama-20 ngaphezulu,” kusho yena. Ubonge umndeni wakhe athi kawuzange umlahle noma inkanto- lo isimgwebile kodwa uqhubekile wakholwa wukuthi leli cala akalenzanga. Uthi ubazi ukuthi umndeni wakhe kukhona okuzamayo ngokuthi aphume ejele.
“Kangikholwanga ngeledlule ngoLwesine ebusuku sesilele ejele kufika uMnu Derrick Mdluli (ongumqondisi weJustice for Prisoners and Detainees Trust) ephethe incwadi ephuma enkantolo, egunyaza ukuba ngikhishwe ejele ngokushesha,” kusho uMnu Phakathi.
Uthi ufuna isinxephezelo ngokubhadla ejele isikhathi eside ehlalele icala angalenzanga. “Ngifuna uhulumeni unginxephezele ngo-R80 million ngokubhadla kwami ejele isikhathi eside kangaka. Ngiphume ejele sekushone nobaba ogule emuva kokuboshwa kwami,” kusho yena.
UMnu Mdluli uthe: “Udaba lwakhe belunamaphutha amaningi enzeke ngesikhathi egwetshwa, yingakho sigcine sikwazile ukuba siphume phambili." Uthi bathole ukuthi imantshi egwebe uMnu Phakathi, kayiwasebenzisanga amalungelo akhe ngesikhathi imgweba - okube yiphutha elikhulu lelo.
Ngesikhathi ikhipha isigwebo imantshi, uthi bekufanele iqale imxwayise uMnu Phakathi ngobukhulu baso, imbuze nokuthi ukhululekile ngokuthi isigwebo ingasikhipha iyodwa noma athole abantu abazoba ngofakazi basizane nayo. UMnu Mdluli uthi noma iyiphi imantshi uma izokhipha izigwebo, kufanele iqale imbuze lowo mbuzo umsolwa.
"Nginxusa zonke iziboshwa ezingaphakathi emajele, ezigwetshelwe amacala okubulala nokubamba inkunzi kuhlonyiwe ezinganikwanga amalungelo azo ukuba zixhumane nehhovisi lami ukuze silulandele udaba lwazo," kusho uMnu Mdluli.