BAZOXOSHA IKATI ELILALA EZIKO
BATHOLE izitifiketi zamakhono ahlukene okuziphilisa abantu abangama-30 abakhubazekile baseMsinga, maphakathi neKwaZulu-Natal - sebezokwazi ukuzivulela amabhizinisi kwazise imali yempesheni abayithola kuhulumeni kayenele ukuba bondle imindeni yabo.
Umcimbi wokunikwa lezi zitifiketi ubukuwadi 12 oFabeni, khona eMsinga ngeledlule. Phakathi kwamakhono abaqeqeshelwe wona wuMasipala waseMsinga, kubalwa ukubhaka izinkwa, wukuthunga, wukupheka, wukusebenzisa isimumathalwazi ( computer), wukukhuluma ngezandla nezolimo. Abahlomule ngalolu hlelo ngabangakwazi ukukhuluma, ngabanqanyulwe imilenze ngenxa yesifo sikashukela, abanye behlelwa yizingozi bangakwazi ukuhamba.
Ukufundiswa la makhono kufane nokwethulwa umthwalo obuhleli emahlombe abo njengoba bethi bebezibona bengabantu abangabalulekile nabahlale bedatshukelwa kanti kukhona abangakwenza.
UMnu Sbusiso Mchunu (29), ongomunye wabathole izitifiketi, ufundele ukuthunga nokubhaka kanti uhamba ngesihlalo esinamasondo emuva kokulimala engozini yemoto. Utshele ILANGA ukuthi akazi angabonga ngani kumasipala ngoba unomndeni odinga yena kukho konke, imali yempesheni kayanele - usezokwazi ukuziphilisa ngekhono alitholile.
“Njengamanje sengikwazi ukuthunga lonke uhlobo lwengubo. Imeya isinikeze nemishini yokuthunga, sizokwazi ukwenza umsebenzi ngendlela esifisa ngayo. Lolu hlelo lusenze sazizwa singabantu emphakathini ngoba bekucatshangwa ukuthi siyizinto zokudatshukelwa kanti nathi singawenza umehluko,” kusho uMchunu waseMachunwini isigodi.
IMeya yaseMsinga, uNkk Buyiswa Ngcobo, ithe inhloso yalolu hlelo lwabo - lokunikeza abakhubazekile amakhono, wukuthi bafuna bangazenyezi futhi bakwazi ukuziphilisa ngawo. “Okuhle ngalolu hlelo wukuthi imakethe bazoyithola khona lapha eMsinga.
"Laba abathungayo sizobatholela izikole bazithungele imifaniswano, ababhakayo sizobahlelela ukuthi imikhiqizo yabo ithengwe kubona. Kukhona nabafundele ukufuya izinkukhu ezikhiqiza amaqanda, sinohlelo lokuthi umkhiqizo wabo uthengwe khona eMsinga. Sifisa ukuba umphakathi usazise ngabanye abantu abakhubazekile ubalethe kithi ukuze nabo sibanike amakhono okuziphilisa,” kusho uNkk Ngcobo.