IZOGUJWA NGE-JAZZ FESTIVAL EYABESIFAZANE ETHEKWINI
BAZOSINA bededelana abesifazane abazobe benandisa kwiMbokodo Jazz Festival ezobe iseShed Port of Durban, eThekwini enyangeni ezokwethwasa. Imbokodo Jazz festival kuthiwa wumcimbi wokuqala lapho abesifazane bezobe beshiyelana khona inkundla.
USihlalo weSouth African Jazz Appreciators Association (SAJAA), uMnu Mncedi Zulu, uthi inhloso yalo mcimbi ukugubha inyanga yabantu besifazane baseNingizimu Afrika abasemculweni wejazz. “Sinabaculi besifazane bejazz abehlukene abazobe bekhona kulo mcimbi.
Sinxusa nentsha ukuba ibambe iqhaza ezintweni eziphathelene nejazz ukuze izokhula kulo mkhakha.
Imicimbi efana nalena sizolinyusa izinga layo ukuze ithuthukise umculo wejazz kuleli,” kusho uMnu Zulu.
Uthi lo mcimbi uzothuthukisa iTheku ngendlela eyisimanga ngoba kuzoqala ukuba nomcimbi wejazz wabesifazane kuphela.
“Sifuna ukuthi uhlelo lwalo mcimbi luphathwe yimbokodo kuphela njengoba kuzobe kugujwa inyanga yayo.
"Imbokodo Jazz Festival ihlela ukuba sezingeni elifana njenge neleStandard Bank Joy of Jazz neCape Town International Jazz Festival,” kusho uMnu Zulu.
Uthi imbokodo Jazz Festival ihlela ukushiya abathandi bomculo wejazz eThekwini bejabulile. Uthi abaculi osekunesiqiniseko sokuthi bazonandisa kulo mcimbi yiFeya Faku Quartet featuring uChantal Willie-Petersen, uLindiwe Maxolo, iDurban-born jazz singer, uSpha Mdlalose, noXolisa Dlamini.
Uthi amathikithi okungena u-R300.00. Imbokodo Jazz Festival ihlelwe yinhlangano engenzi nzuzo i-Theku Regional Jazz Association (iTReJA).
phumelela@ilanganews.co.za