I-1 KZN IZA NEZINGUQUKO EZINQALA
SELIZOGAYA ngomunye umhlathi esiteshini sikamabonakude esizinze eRichards Bay enyakatho yeKwaZulu Natal, i-1 KZN TV njengoba kuzokwethulwa ngokusemthethweni izinhlelo eziyisihlanu ngase kupheleni kwalo nyaka.
Lezi zinhlelo kulindeleke ukuba zenyuse isibalo sababukeli kulesi siteshi njengoba zizokhuthaza abathandi bomculo ikakhulukazi umculo wamakwaya.
UMnu Edwin Mncwango, ongumphathi walesi siteshi, utshele ILANGA ukuthi yize engafuni ukuyikhulumela eziko kodwa lesi siteshi sezizoba nohlelo lomculo wamakwaya lapho ezobe esina ededelana enkundleni.
Uthi bazophinde babe nohlelo lapho ababukeli bezobe bezikhethela bona izingoma abafuna zidlalwe. Uthi zonke lezi zinhlelo kulindeleke ukuthi zinyuse isibalo sababukeli njengoba besiwu-2.5 million kodwa manje sesifinyelele ku-4 million.
Uthi okunye abafisa ukukwenza wukuthi bandlondlobale bangagcini ngokuba seMpangeni kuphe- la.
Utshele leli phephandaba ukuthi njengoba besezinhlelweni zokwethula ngokusemthethweni lezi zinhlelo eThekwini bafuna ukuvula ihhovisi eMgungundlovu, eGoli, esifundazweni iMpumalanga naseSwazini.
Uthi bathule ngokusemthethweni izinhlelo ezintathu ePort Shepstone ngonyaka owedlule ngenhloso yokwandisa isibalo sababukeli.
“Inhloso yokuba sivule amahhovisi kwezinye izindawo yingoba sifuna ukuthola ukuthiyiziphi izinhlelo abalandeli abathokozela ukuzibuka. Sifuna isibalo sababukeli sinyuke kakhulu kunalokhu.
"Ngikhuluma nje iKwaZuluNatal ihamba phambili ngesibalo sababukeli kulandele iGauteng besekuza iSwaziland,” kusho uMnu Mncwango. Uthi izinhlelo zabo zehlukile kwezinye iziteshi ngoba kugxilwe kwizinhlelo zaseNingizimu Afrika.
Uthi njengoba kudlalwa izinhlelo zasekhaya izibalo zinyuka zinyukile ngoba abantu bakuleli bethokozela ukubuka izinto zabo namasiko abo.