KUXHASWE ABAFUNDI BASE-UNIZUL
LUYAPHELA usizi olubhekene nabanye abafundi abahlwempu, abanenkinga yokukhokhela izindleko zabo e-University of Zululand (Unizul), KwaDlangezwa, eMpangeni, enyakatho-mpumalanga yeKwaZulu-Natal njengoba i-Amalgamated Banks of South Africa (Absa) ixhase le nyuvesi ngo-R5 million.
Le mali ngeyokulekelela abenza iziqu zeCommerce, ezeHumanities, eze-Education nezeScience. I-ABSA ithi inemali engango-R1.4 billion eyibekele ukuthuthukisa ezemfundo nokukhulisa amakhono kuze kube wunyaka wezi-2018.
Okhulumela i-Unizul, uNkz Gcina Nhleko, uthi bajabule kakhulu ngokunikelelwa ngale mali kwazise izosiza kakhulu abafundi abaswele - abaphasa kahle yibona abaseqhulwini.
Uthi khona maduze nje, bazoqala bahlanganise uhlu lwabafundi abaphasa ngaphezulu kuka-70% ezifundweni zabo bese bexhaswa kuwona lo nyaka ngoba imali seyikhona.
“Ukuxhaswa kwethu kuyasijabulisa kakhulu ngoba kukhombisa ukuthi esikwenzayo kuhle kuyabonakala futhi i-Absa iyakholelwa kithina,” kusho uNkz Nhleko. Uthi kuzocutshungulwa uhlu lwabafundi ngoku- cophelela ngoba kumele kuhlomule laba okunesidingo sokuba baxhaswe.
Utshele ILANGA ukuthi ama90% abafundi bakule nyuvesi, afunda ngemali kahulumeni, okusho ukuthi le mali inesidingo esikhulu kubafundi. Uthi abazohlomula yilaba abangakaze bazithole iziqu zokuqala.
ISekela-shansela lase-Unizul, uSolwazi Xoliswa Mtose, libongele le nyuvesi nabafundi abazohlomula. “Abafundi bethu abaningi bavela ezindaweni ezi- hlwempu, siyethemba ukuthi ukubambisana kahle kwethu naleli bhange kuzokwenza umehluko omkhulu,” kusho uSolwazi uMtose. Imenenja yakwaAbsa KwaZulu-Natal, uMnu Faisal Mkhize, ithi imfundo yasenyuvesi ivulela abafundi amathuba ukuze kushintshe impilo yabo bonke abantu.
“Sijabule kakhulu nathi ukuba kube nesikwenzayo ukusiza abadingayo. Siyaziqhenya ngokuzibophezela ekwenzeni