UMHLELI UDINWA NGAMAQOLA ASEBENZISA IPHEPHANDABA
UBHODLA umlilo umhleli wephephandaba lomphakathi eKokstad, eningizimu yeKwaZulu-Natal, ngabasola ngokuqola ngegama lephepha lakhe befuna amathenda komasipala.
Umhleli omkhulu ophinde abe ngumqondisi weZwe le-Afrika, uNkz Zoliswa Mayila, usevulele iphephendaba iPondo News yakhona eKokstad, icala elisola ngokuthi liqola ngephephandaba lakhe, lifuna amathenda komasipala ngegama lenkampani yakhe ngale kokumazisa.
UNkz Mayila uthi uthole ukuthi iPondo News ifakele ithenda yokwenzela uMasipala waseNtabankulu umsebenzi wokukhangisa. Kuthiwa bekufuneka i-quotation yamaphephandaba amathathu azofaka isicelo salo msebenzi, obekuzothi elibize imali encane kunawo wonke, kube yilona eliwutholayo - umsebenzi wokuba lo masipala ufake izikhangiso zawo kulelo phephandaba - bese likhangisa ngawo.
Ngokusho kukaNkz Mayila, iPondo News isebenzise igama leZwe leAfrika njengenye yezinkampani ezoba ngeyesithathu kodwa ezofaka i- quotation enemali enkulu ukuze umsebenzi ugcine utholwe yiyona (iPondo News).
Ithumba libhoboke ngesikhathi kunezinto eziphambanayo kumaquotation kwabe sekuphoqeleka ukuba isisebenzi sakwamasipala sibuyele kuNkz Mayila simcela ukuba alungise obekuphambene. “Ngethuke kwaphela nasozwanini ngoba bengingasifakanga isicelo salo msebenzi. Sengineminyaka ngigcine ukufaka isicelo somsebenzi kuMasipala waseNtabankulu. Ngibe sengenza uphenyo ngathola ukuthi abantu abenze umkhonyovu nge- phephandaba lami yiPondo News.
"Okungidina kakhulu nje babhizi bagaya imali besebenzisa iphephandaba lami mina ngibe ngidonsa kanzima, kangangoba sengakhetha ukuba zivalwe ephepheni lami izindaba ezithinta lo masipala ngenxa yokuthi kasiyitholi imisebenzi khona.
"Bengihlale ngizibuza ukuthi kungani ngingawutholi umsebenzi kanti kunomuntu ohlale engifakela i- quotation yemali enkulu ngephephandaba lami,” kusho uNkz Mayila.
Uthi unqume ukulibopha leli phephandaba ngoba efuna ukuthola ukuthi kungani lenze lokhu lingaxhumananga naye. “Ngithole ukuthi sekunesikhathi lo mkhonyovu wenzeka. Okunye engikutholile wukuthi kakusilona elami kuphela iphephandaba okuqolwe ngalo, akhona amanye okudliwa imali ngamagama awo,” kusho yena.
UMnu Vusumuzi Mgoduka oyimenenja kaMasipala waseNtabankulu, uthe uyalwazi lolu daba.
“Bese ngizwile ngalolu daba, ngishayelwe ucingo ngumhleli walo leli phephandaba, uNkz Mayila, sengithumele ehhovisini lami ukuba baluphenye,” kusho uMnu Mgoduka. Umhleli wePondo News, uMnu Max Mxabu, uthe uyalwazi lolu daba wathi uzobheka ukuthi yenzeke kanjani le nto.
“Ufikile uNkz Mayila kimina ezobika ngalolu daba ngamthembisa ukuthi ngizolusukumela ngiphenye ngalo,” kusho yena. Uvumile ukuthi usebenzisana nalo masipala bawukhiphela izikhangiso. Okhulumela amaphoyisa KwaZuluNatal, uLt Colonel Thulani Zwane, uthi likhona icala lokukhwabanisa elivuliwe eKokstad bekungakaboshwa muntu, amaphoyisa asenza uphenyo.
Kakusilona elami kuphela iphephandaba okuqolwa ngalo maningi namanye.