Kusolwa ikhansela le-IFP ngokuphehla udlame
Kuthiwa lihlohla umphakathi ukuba ubhikishe
LISOLWA ngokugquqguzela udlame nokungezwani emphakathini waseGujini, eCezwane, eJozini, enyakatho-mpumalanga yeKwaZulu-Natal ikhansela leNkatha Freedom Party (IFP).
UMnu Jabulani Buthelezi oyikhansela leqembu (IFP) kuwadi 4, eJozini, usolwa ngokugqugquzela umphakathi ukuba ubhikishele uMnu Tholumuzi Zikalala oyikhansela lale wadi elithunywe yi-African National Congress (ANC). UMnu Zikalala udle umhlanganiso okhethweni lohulumeni basekhaya obelumhla zintathu kuNcwaba (August). Unqobe ngamalengiso emuva kokuba evotelwe ngobuningi ngamalunga omphakathi abethi afuna ukujezisa i-IFP eke yaphatha le wadi iminyaka eminingi ilandelana kodwa yehluleka yancama wukufeza izidingo zawo. ILANGA libike ngabanzi ngodaba lombhikisho womphakathi wakule ndawo, ovale umgwaqo ngoba usola uMnu Zikalala ngokuthi uqasha ngokubheka umbala wesikibha seqembu lezepolitki.
Usolwe ngokuhambisa intuthuko ngokweqembu lakhe. NgoLwesine bekunesigcawu sobuholi balo masipala namalunga omphakathi kubhekwa ukuthi kungaphunywa naziphi izixazululo kulolu daba.
Kulapho-ke uMnu Zikalala egagule uMnu Buthelezi njengomvukuzi nomphehli wodungunyane. “Ngiyavuma ukuthi kuyobe kusho ukuthi kangisebenzi uma ngingasolwa ndawo.
"Okwamanje kuseyimina ikhansela eliphethe lapha ewadini, lokho kusho ukuthi uyathanda kawuthandi, kuzofanele ukwemukele kuze kube wukuthi kuphela ihlandla lami. Maqondana nale mibhikisho, uyedwa umuntu ovukuza abantu ethi mabavale umgwaqo, lowo nguzakwethu uJabulani Buthelezi.
"Kangazi ngoba akasona nesakhamuzi kule wadi. Wehlulekile wukuvikela uwadi 2 abewuphethe oBonjeni, usezosusa umsindo lapha.
"Khona nginawo amaphutha kodwa okubuhlungu ngihlaselwa nguzakwethu, nokwenza-ke ojutshwe yiqembu lakhe ukuba azolisebenzela lapha. Kangazi noma yiyona ndlela yokucela amavoti kubantu yini lena.
"Kukho konke lokhu okhala ngakho umphakathi ngizozama ukukulungisa,” kusho uMnu Zikalala. Okulandele lapho, uMnu Zikalala unikele emsakazweni womphakathi oseJozini, iMaputaland Community Radio waqhubeka nokugagula uMnu Buthelezi njengomphehli wodlame. Naye uMnu Buthelezi unikele kuwona lo msakazo ngoLwesihlanu eyozama ukuhlanza igama lakhe.
Uthe kakulona iqiniso ukuthi nguyena ogqugquzela abantu ukuba babhikishele ikhansela.
Unxuse uMnu Zikalala ukuba asondele kuyena basebenzisane ngezinto eziningi okufanele kuthuthukiswe ngazo umphakathi. UMnu Buthelezi uthi umsindo kudala waqala ukufufusa. Uthi sekunesikhathi eside ethola imibiko ngezenzo zokungahambisi kahle kukaZikalala. “Phambi kukaJehova, kakimina otshele abantu ukuba babhikishele uZikalala.
Okwamanje kuseyimina ikhansela eliphethe lapha ewadini... Uyathanda wuthandi kuzofanele ukwemukele...