I-MUT YETHULE I-MASTERS ENTSHA
UKULAHLEKELWA ngabafundi ngenxa yokungabi nemikhakha ethile eMangosuthu University of technology (MUT), kwenze lesi sikhungo sathuthukisa izinga laso lezobuchwepheshe neminye imikhakha.
IMUT eseMlazi, eningizimu yeTheku, yinyuvesi yokuqala yezobuchwepheshe esiqhamuke neMasters Degree kwiNature Conservation. Ithi kulo nyaka inqume ukuba nalezi zifundo (Masters) ngoba abafundi sebethola amadlelo aluhlaza kwezinye izikhungo ngenxa yokuthi kabasiboni isidingo sokubuyela eMangosuthu beyolekelela abanye kwezocwaningo njengoba inyuvesi ingayenzisi iMasters.
USolwazi Alfred Msomi, oyisikhulu esiphezulu kwifaculty yakwaNatural Science kule nyuvesi, uthi lo mnyango yiwona ohamba phambili ngenxa yokuthi uqukethe iziqu okubalwa kuzona i-Information Communications and Technology, iMethamatical Science, i-Agriculture, iCommunity Extention, iBiomedical Sciences ne-Environmental Health. Utshele ILANGA ukuthi inhloso yabo wukuba le nyuvesi ihlonishwe kwezocwaningo.
“Izinga losolwazi liyashoda kakhulu eNingizimu Afrika, uma sikhulisa izinga lemfundo lokho kuzolekelela kakhulu. Kasigcinile ngeMasters kwiNature Conservation ngoba ngonyaka ozayo sizobe siqala iDoctorate Degree kwiBiomedical Science okungenye yezindlela zokuphakamisa inyuvesi.
"Kasithandi ukuthi uma abafu-ndi sebethole i-Advanced Diploma bese beya kwamanye amanyuvesi ngoba lokho kakuyisizi inyuvesi kodwa kumele namathuba omsebenzi bawathole ngaphakathi.
"Siyaziqhenya ngokuthi inyuvesi ikhombisa ukukhula futhi nakwe-zinye iziqu. Abafundi abazothola iMasters sebezokwazi ukulekelela abasemuva kwabo,” kusho uSolwazi uMsomi.
Uthi ucwaningo olwenziwa ezingeni le-Advanced Diploma kalukho ezingeni lokuba inyuvesi ingaziqhenya, yingakho sebehlale phansi beyisikhungo benza umehluko.
Le nyuvesi ivule indawo enkulu ebizwa ngeSouth African Medical Research Council (SAMRC) enenxakanxaka yemishini ezosetshenziselwa ucwaningo.
Kwenzeka lokhu nje, inyuvesi inengqungquthela yocwaningo eqala namhlanje ngoMsombuluko eNkosi Albert Luthuli International Convention Centre (ICC) eThekwini.
Izobe ihlanganise na-manyuvesi aphesheya okubalwa kuwona iLouisiana State univesity yase-United States of America (USA) ne-University of Nottingham yase-England.