Ungakudli osekonakele
UMPHAKATHI osezingeni eliphansi lomnotho, kokunye ngisho lingekho phansi kangako, kuyenzeka uzithole usuguliswa wukudla okuvundile kumbe okonakele ngezizathu ezahlukene.
Sindlalela le ndaba ngezinga lomnotho nje, yingoba iningi lethu liyazi ukuthi abadala, ngenxa yokudonsa kanzima empilweni, besiye sizwe bethi ukudla kakulahlwa noma kakuchithwa.
Nenyama esiye siyibone isinezimpethu emizini okuhlatshiwe kuyona, abadala kabasho ukuthi lokho yizimpethu kodwa baye bahloniphise ngokuthi leyo nyama isinobomi - bese beqhubeka nokuzidlela yona.
Iyini ngempela i- botulism? Ziningana izinhlobo zayo, phakathi kwazo okubalwa i- food botulism, i- wound botulism, neinfant botulism. Namuhla sibheka i- food botulism.
Yisifo lesi esingagcina ngokukhipha isidumbu uma zingathathwanga ngokushesha izinyathelo zokwelapha lowo esimphethe.
Kuthiwa ubuthi baso bumunceka kalula emgudwini wokudla wesisu emuva kokuba umuntu edle ukudla okonakele kumbe okunalobo buthi, kungakhathalekile nokuthi buncane kangakanani.
Ibangelwa wuhlobo oluthile lwe- bacteria olubizwa ngeClostridium botulinum.
Ukudla kuba nalobu buthi uma kungagcinekile kahle. Kuvame ekudleni okugcinwe ethinini ekhaya, okungaba noju, usulubha ( syrup) amazambane abhakiwe noma inyama yenhlanzi.
I- botulism iziveza ngokuba ohlabekile abe namajaqamba esiswini, angaboni ngokucacile, yinzululwane, wukuphefumula kanzima nezicubu zomzimba zizwele ukukhathala.
Ukugwinya nokukhuluma kuba nzima. Umlomo uyoma futhi kucanuzele inhliziyo. Ezinganeni ezisencane, izimpawu ebonakala ngazo kuba wukungakwazi ukuphendula kahle ikhanda, ubunzi- ma uma bezama ukuncela noma ukudla, wukusindwa yizinkophe, wukukhathala, wukuba wumfece kwemilenze nezingalo, wukukhala ngendlela ebonisa ukukhathala.
Kayithelelani nokho. Ayaphela amasonto amabili noma ngaphezulu. Kuyehluka kumuntu ngomuntu, kodwa abanye izimpawu ziyabonakala emuva kwamahora ali-12 kuye kwangama-36 umuntu edle ukudla okungalungile. Nazi ezinye zezimpawu ezikhomba ukuthi lowo ohlabekile impilo yakhe isengcupheni, sekudingeka kuphuthunywe kwadokotela:
Izinhlamvu zamehlo ziba nkulu ngokungajwayelekile; Ubona kaluvindi; Izihlathi ziyadedeleka nhlangothi zombili;
Uma ekhuluma uyashwashwatha, angezwakali;
Ukucanuzelelwa yinhliziyo, aphalaze futhi abe namajaqamba esiswini;
Umzimba uba ndikindiki, angakwazi ukunyakaza. Ngenxa yobucayi bokudla ukudla okonakale ngale ndlela, usizo lukadokotela luhlala njalo luphuthuma. Nokho kukhona ongakwenza ekhaya ukugwema isimo sokonakala kokudla ngenxa yamaphutha okukugcina. Nazi ezinye zalezo zinto:
Gcina indawo ehlala ukudla ihlanzekile;
Ukudla okusalile makufakwe esiqandisini, kungahlali nje ezingeni lokushisa lasendlini;
Ungayigcini ezingeni leqhwa inyama esike yasuswa iqhwa;
Hlanzisisa indawo olungisela kuyona ukudla ngesikhathi upheka;
Geza izithelo nemifino ngaphambi kokuba ukudle;
Kulahle ukudla okunephunga elikhombisa ukuthi sekonakele;
Hlanza izandla njalo nje uma upheka noma emuva kokuya endlini yangasese. bonginkosi@ilanganews.co.za Umthombo ngabe: medicinenet. com