Ungene ngoSomnandi kumasikandi
KUSEKUDE ukuthobeka amanxeba kubathandi bomculo kamasikandi ngokulimala isigubhukane kwensizwa ebinekhono ngendlela emangalisayo kwezomculo yashona ngokukhulu ukuzuma kungakezwakali nokuthi ibambekile empilweni.
Namanje kusakhalwa izwe lonke ngoMusawenkosi “Khwelebhasini” Majola odlule emhlabeni eneminyaka engama-34 ubudala waseMacekana, eMpangeni, enyakatho neKwaZulu-Natal kwazise bekuyinsizwa ebiya kude kakhulu kumasikandi, igabe ngephimbo elimnandi nobugagu obumangalisayo. Ukudlula kwale nsizwa emhlabeni mhla zingama-31 kuNcwaba (August) wezi-2014 kwayilimaza indima kamasikandi yonkana. ILANGA likuthatha likubeka ngomlando wakhe omncane eliwuthole emndenini wakhe kumfowabo omdala okunguMnu Thembuyise Majola noThokozani “Somnandi” Langa ngokwesigaba sasemculweni kwazise uKhwelebhasini ufike kwezomculo ngoSomnandi okunguyena owamuvezela izwe lonke kungesiyena kuphela ngoba noMadlanduna (indodaba kaBhekumuzi) Luthuli lavela ngoSomnandi ikhono lakhe.
Omunye umlando siwucotshelelwe nguMnu Phakamani Lamula osebenze isikhathi eside noKhwelebhasini.
Le nsizwa ibivamise ukuzihasha kanje uma isivukwe usinga estudiyo uma irekhoda” “Kunjalo Wethu!! Umshubo, Usefikile lowo mfana owuhlupho Ushloboo sami unomgqi unomgqa, Unkulum’ azipheli kwelakubo eMpangeni,
Umajuba adlukhethe phezu kwendlu,
Uskhiye esivul ekuseni esitolo somnumzane,
Uzehlo ziningi mpilo yami usuyobekezela,
Noma ungayiphika lengoma kodwa uma usuwedwa uyasho ukuthi uyinkinga uKhwelebhasini,,
Ungene kanjani ebhasini ungenalo ithikithi ngizolishaya ikhanda!!
USteve Kekana impangele ekhala igijima,
UNkulunkulu noSathane bahlezi bobabili esihogweni, Ibheji elibomvu lakwaMajola,’ Ngivalile phela engani abakithi bomndeni banomona,
Us’khiye esivule ekuseni esitolo soMnumzane,
Unkulumo azipheli kwelakubo eMpangeni, Umzukulu kagogo uNkomeshefile, Udivoza ikhaladi”
UKhwelebhashini ungene kwezomculo ngonyaka wezi-2009 mhla zili-10 kuNhlolanja(February) emuva kokuba uSomnandi ehlonze ikhono lakhe kade emuzwe efonele emsakazweni (uKhwelebhasini) ohlelweni lukaKhathide “Tshatha” Ngobe wangena emoyeni washaya ingoma kaShwi noMtekhala ethi “Wangisiza Baba” wabe esezwa ikhono lale nsizwa uSomnandi wazama ngawo wonke amandla ukuba ayithole ngoba ezwa ikhono layo eliqhakazile.
USomnandi uthi ubeqala ukuzwa ikhono elifana naleli lokuba umlaleli akwazi ukucula ingoma yomuntu aze acishe adlule umniniyo aqondanise ukotini nenalithi. Uthi bekuthi kuzona zonke izindawo abehamba kuzona elokhu exoxa etshela abantu ukuthi kunensizwa ayizwe emsakazweni kade ifonele ohlelweni lukaTshatha yamculela kamnandi.
“Ngesikhathi ngizwa lensizwa icula emoyeni, abuzange bufike ubuthongo ngangiqala ukuzwa ikhono elinjena kuvele kwaphela ubuthongo.
"Ukhwelebhasini akayenzanga lento yasemculweni yokukhankasa ngedemo uma ufuna inkampani, ngingasho nje ukuthi akazange afune izinkampani kodwa yimina engamfunayo. Bengilokhu ngixoxa ngale nto ebantwini kwaze kwaba khona insizwa ethi iyamazi uKhwelebhasini yamtshela ukuthi ngiyamfuna sadibana kwaMai-Mai eGoli ngambuza ngaleli khono lakhe wabe esengitshela ukuthi ubengakaze aziphuphe engena emculweni kodwa ubeziculela ngasemakhaya egida ingoma ebufaneni bakhe.
Angichithanga isikhathi ngivele ngaxhumana ne-nkampani iBula Record ngacela ukuba imuqo-phe. Ikhono lakhe ngi-ngalifanisa nelikaSbo-ngiseni “Mphondi” Ntombela(ongasekho) waMageza Amahle obekuthi uma eziculela ngaphandle kwendlu yakhe eDenver engazinakele lutho mhlawumbe uma ewasha izimpahla zakhe, abone ngabantu sebemnkankile belalele leliphimbo lakhe ebeliyinkinga.
"Ngikhuluma nje uKhwelebhasini udlule emhlabeni esengivumela (Backings) kwenye yamaalbhamu yami ethi “inganekwane”.
Bengingathembi nokuthi engakwazi ukukwenza lokho kodwa wangena khaxa ngoba bengithi ngisafuna ukumhlola ukuthi uzokwazi yini ukudlala loshuni wami. Angikaze ngilibone ikhono elifana naleli emhlabeni. Lowa muntu benoBonakele Masango izithupha ziyegwayini ngobugagu,” kusho uSomnandi. Uthi ayikho ingoma obungeke umnike yona uKhwelabhasini imehlule ukuyicula futhi bebeqhudelana nangokubhala izingoma. Uveze nokuthi kwalona igama lokuthi unguKhwelebhasini waliphiwa nguyena uSomnandi naye elithathe kuMnu Phakamani Lamula wasoNdini walicela wathi kunensizwa ezongena emculweni usacela ukuyiqamba ngaleli gama ukuze lizongena kalula emakethe. Bekungesilona iqiniso ukuthi uKhwelebhasini wayegibele ebhasini engenalo ithikithi wabe eseqanjwa izinsizwa zangakubo kodwa bekuyindlela yokuheha abantu ngale nca- zelo, empeleni yigama leli elacelwa kwenye insizwa nayo egcine isisebenzisana naye uKhwelebhasini kwezomculo.
Umfowabo kaKhwelebhasini, uMnu Thembuyise Majola, uthi ekukhuleni kukaKhwelebhasini kwakuvele kukhombisa ukuthi ngelinye ilanga engaphelela kwezomculo ngoba ubejwayele ukuhlanganisa izingane zasendaweni yangakubo bacule ikwaya nakuba ikhono lakhe belilihle kakhulu ebholeni.
Uthi ubengumuntu ozothile nobathandayo abantu futhi engaziphakamisile.
“Bekubonakala ukuthi usaya kude emculweni lomuntu kwazuma-ke ukufa. Lomuntu ugule amasonto amabili kangangokuba nasesibhedlela uziyele yena kungekho okubi okutheni.
"Ugulile sihleli naye eGoli ngathi kungcono aye ekhaya ukuze bezokwazi ukumnakekela kwathi ngesonto lesibili kwamtshontsha ukufa kube khona ukuthwebuleka uma sesikulandelela ukudlula kwakhe kwazise nethuna belidlobhoka nangendlela abebukeka ngayo emakhazeni ibingajwayelekile,” kusho uMnu Majola.
Uthi ekukhuleni kukaKhwelebhasini ubebizwa ngoVovo esafunda amabanga aphansi eNdondwane Primary, wadlulela eMningi High wabe esemusa emakhaya wathi akayofunda eGoli ngoba efuna athole izinga lemfundo engcono. UGrade-10 uwufunde e-Anchor Comprehensive High eSoweto waze wafika kwamatikuletsheni nakuba engawuphothulanga.
Emuva kwalokho usukumile wafuna amatoho wabe eseqashwa eCity Deep okuyinkampani esebenza ngezitshalo nakhona wayeka wagxila emculweni. I-albhamu yakhe yokuqala iphume ngowezi-2009 ethi “Nkosingibheke” kwalandela ethi “Shonamalanga”, kwaba ngethi “Long story” kanti ngonyaka wezi-2012 uthathe ikhefu ngoba izinto bezingasahambi kahle enkampanini iBula. Ubuyile ngenye ethi “Ngiyistrees” ayiqophe ngaphansi kwaMabunjwa Records esehlangene neMfezemnyama emkhulumele kubaphathi bale nkampani. Kufika ukufa nje ubesenelinye iqembu elibizwa ngaBagibeli abasihloko esithi “Ngingqongqo”.
Unezingane eziyisi-6 ubengakabi nayo ingoduso.