Sebenzisani imiqondo ningagijimeli ezinkundleni zokuxhumana
IYADUMAZA indlela abanye abantu bakithi abenza ngayo izinto. Udaba lokucokofulwa kukaDemi-Leigh Nel-Peters onguMiss South Africa esolwa ngokucwasa ngokobuhlanga ngesikhathi evakashele esikhungweni esigada izingane ezimpisholo, i-Ikaneng, eSoweto, luyethusa.
Le ntokazi ibiyingxenye yamavolontiya abeye kulesi sikhungo ngokohlelo obeluxhaswe yiMaslow Hotel engaphansi kweSun International. Okuqhathe uDemiLeigh nabantu - abebecabanga ukuthi uyacwasa - wukuthi ubefunza izingane ezimpisholo ukudla egqoke amagilavu, okwenze abanye babuze ukuthi kungani enza lokhu enganeni emnyama.
Kucace bha ukuthi laba abasola le nkosazane, bavele bavuka nje bangabheka zonke izinhlangothi zobekwenzeka, baqobela ezinkundleni zokuxhumana lokhu obekusezinhliziyweni zabo.
Kube ngokunye uma umQondisi weziNhlelo e-Ikaneng, uCarol Dyantyi, eseveza ukuthi empeleni wonke amavolontiya - ngisho nezisebenzi zalesi sikhungo imbala - bekufanele agqoke amagilavu ngesikhathi elungiselela izingane ukudla ukwenzela inhlanzeko.
Kungani laba bantu bagqanyelwe yindaba yokucwasa kodwa bakhohlwe wukuthi lo muntu abamgxekayo ubeyingxenye yohlelo lokukhombisa isihe ezinganeni?
Okungenzeka nje ukuthi bebematasatasa beqhofoza omakhalekhukhwini babo ngezinzipho bona kabakaze basize ngisho omakhelwane babo abadla imbuya ngothi? Kungani ngempela abantu bakithi indaba yokucwaswa seyiphenduke umsebenzi oholelayo kubona?
Kayisekho nje enye into abake bayibone kwezinye izizwe ngaphandle kokuthi ziyabacwasa? Kasiphiki, bakhona abamhlophe, amaNdiya ngisho namaShayina imbala ababacwasayo abantu bakithi - njengoba bekhona nabampisholo abazicwasayo ezinye izizwe. Lokho kodwa makungenzi abantu bakithi bahlale becuthele ukuthi bona bazocwaswa noma bayacwaswa.
Ukuhlale sibona ukuthi siyacwaswa - ngisho singacwaswa - ngenye yezinto ezokwenza ukuba indaba yokucwasana eNingizimu Afrika ingapheli. Le nto isiphenduka ngisho ihawu abantu abavika ngalo ngisho besemaphutheni - ngoba befuna ukuzwelwa.
Kuba lula ukubhekisa umunwe kwezinye izizwe ngisho sezenza okuhle - esikubona kuyinzondo ezoqhubela phambili ukungahoshelani ezinhlangeni ezahlukene zaseNingizimu Afrika.
Ake sisebenzise imiqondo yethu ngaphambi kokuba sigijimele ezinkundleni zokuxhumana ngoba ukuvele ubhale nje, kwenza thina yindlu emnyama sibukeke njengabantu abangacabangi ngaphambni kokwenza izinto. UDemi-Leigh ubesiza izingane futhi nje zijabule ukuthola le ngqayizivele yethuba lokuvakashelwa nguMiss South Africa.
Le nto izokwenza ukuba ngisho ezinye izinhlanga sezifuna ukusisiza ngezinhliziyo ezimhlophe, zibe mathintanyawo ngoba zesaba ukuthi zizokwenza amaphutha ezizombelwa ngawo izisele. Kuyiqiniso elimsulwa ukuthi siyadingana sonke emhlabeni ngakhoke ukuqhubukushana ngokobuhlanga, ngeke kwasisiza. Ake siqale sicabangisise ngaphambi kokugijimela ezinkundleni zokuxhumana uma ngabe sifuna ukuhlonishwa siyindlu emnyama.
Izinhlanga zizoba manqika uma zifuna ukusiza ngenhliziyo emhlophe zesaba amaphutha angase enzeke.