Iyabhubha iZimbabwe
KUVELA ezithi sishoshela emafini isikweletu esibhekene neZimbabwe njengoba sizonyuka ngemali engaphezu kuka-R16 billion nonyaka ngenxa yokutakula kwayo abalimi ngoxhaso lommbila.
UMengameli waseZimbabwe, uRobert Mugabe, uthi lolu xhaso luzokwenza izwe lakhe likwazi ukuzimela ekukhiqizweni kommbila futhi lusize nabalimi abatabalasayo. Uhulumeni wakuleliya lizwe umemezele ngonyaka odlule ukuthi uqala uhlelo lokugqugquzela abalimi njengengxenye yomkhankaso obizwa ngeCommand Agriculture, wathi uzobakhokhela u-R5 219 ngethani lommbila esivunweni sanonyaka ukubagqugquzela ukuba batshale.
Cishe ama-70% ezakhamizi zaseZimbabwe ahlala ezindaweni zasemakhaya, ancike kwezolimo ukuziphilisa.
Nokho uhulumeni kawukaze usho ukuthi yini ozoyenza ngommbila owuthengile - mhlawumbe njengokuthi uzowudayisela bani, ngamalini.
Kubikwa ukuthi lolo lwazi luyadingeka ukuze kwaziwe ukuthi lolu hlelo luzowudla malini uhulumeni. Nokho iGrain Millers Association of Zimbabwe, okuyinhlanganisela yezikhondlakhondla ezili-100 zabagcini bommbila ovuniwe, ivumile ukuthenga amathani ayizi800 000 ommbila kuhulumeni ngoR2 596 205 000 esivunweni sale sizini noma kube wu-R3 238 ithani ngalinye - ngokusho kukasihlalo wayo, uTafadzwa Musarara.
Lokhu kusho ukuthi uhulumeni uzolahlekelwa wu-R1 967,23 ithani ngalinye ozolithenga kubalimi bese ulithengisela abagcini bommbila - kuzoba wu-R1 579 135 000 seyihlangene yonke le nkece.
Leli lizwe selivele liyadunguzela ngenxa yezikweletu njengoba selihlalelwe wukukhokha nenzalo ku-R93 677 500 000 wemali eliyikweleta amanye amazwe - okuyimali engangengxenye yemikhiqizo eyenziwa kuleliya lizwe - kanti nasekhaya liyakweleta.
Ekhaya likweleta u-R 53 530 000 000 emuva kokuba lisebenzise imali leqisa ngo-R 21 412 000 000 ngowezi-2016 - bekuqagulwe ukuthi lingase lisebenzise u-R 2 007 375 000. Kulo nyaka kuqagulwa ukuthi iZimbabwe ingase ilahlekelwe wu-R5 353 000 000. UNgqongqoshe wezeziMali eZimbabwe, uPatrick Chinamasa, akafunanga ukuphawula ngezibalo zoxhaso.
Ukhiphe isitatimende ephephandabeni eliphethwe wuhulumeni, iHerald, mhla zingama-28 kuNhlangulana (June) evikela uhlelo lwabo lokweseka abalimi.
“Lolu hlelo lwakhelwe ukusimamisa abalimi bethu ukuze kube nokudla okwanele ezweni, kunqandwe ukudla okusuka kwamanye amazwe, kunyuke umtha- mo womkhiqizo osuka kuleli lizwe uya kwamanye amazwe kunciphe nenkemane,” kusho uChinamasa. Yize uhulumeni ungathandabuzi ukuthi lolu hlelo luzokondla isizwe, uMengameli weMovement for Democratic Change (MDC), uMorgan Tsvangirai, uthe luzonothisa amalunga eZimbabwe African National Union - Patriotic Front (Zanu -PF) athole umhlaba emuva kokuba uphucwe abalimi abayizi-4000 abamhlophe kusukela ngonyaka wezi-2000. Umthombo ngabe: EyewitnessNews