ISENZO SE-USA SINENGE I-NORTH KOREA

IPHEPHANDABA eliphethwe wuhulumeni waseSouth Korea, iRodong Sinmun, lisigxeke kakhulu isenzo sezindiza ezimbili zaseUnited States of America (USA), zohlobo lwe-B-1B ezidedele amabhomu eKorea Peninsula, ngesikhathi ziviliyela.

Leli phepha libhale izolo ngeSonto ukuthi kuyingozi lokhu obekwenziwa yilezi zindiza futhi kungase kuqubule impi yenuzi. Lichaze lesi sigameko njengochuku nje oluhambisana nobudedengu. Lezi zindiza zombutho wezempi wase-USA, zidedele iziqhumane ngoLwesihlanu amasosha eziqeqesha eSouth Korea.

Ezinye izindiza ezimbili okuyiSouth Korea F-15 ne-US-16, zijoyine ama-B-1B kulo mviliyelo.

NeJapan F-2 okuyijethi yezempi iwajoyinile lawa mabhanoyi andiza njalo phezu kwe-East China Sea elibangise esikhumulweni sawo esiseGuam - okuyisiqhingi esilawulwa yi-USA entshonalanga yolwandle iPacific.

Lokhu kuviliyela kwala masosha ase-USA ezasemoyeni, okuthathe amahora ali-10, kwenzeke ezinsukwini ezintathu emuva kokuba iNorth Korea kade ivivinya imicibisholo yayo ekhafula umlilo ehamba ibanga elide mhla zizine kuNtulikazi (July), okuwusuku i-USA esuke igubha ngalo inkululeko.

UMengameli wase-USA, uDonald Trump nabaholi baseJapan nabaseSouth Korea, bakhiphe isitatimende ngokuhlanganyela kade besemhlanganweni we-G-20 basigxeka isenzo seNorth Korea.

I-USA izithethelele mayelana nomviliyelo wayo yathi ikwenze lokhu ngoba ikhombisa ukuzivikela ngokucisha umlilo ngomlilo futhi ikhombisa ukubumbana kwayo namadlandawonye ayo - okuyiJapan neSouth Korea. Umthombo ngabe: USATODAYa