EZIMNANDI KWABEBHOLA KUFIHLWA U-BIZZAH
IZIHLATHI zivakashele izindlebe ezingwazini zikanobhutshuzwayo waseNingizimu Afrika ngesikhathi uThulas Nxesi onguNgqongqoshe WezeMidlalo kuleli ememezela ukuthi kuzovulwa isikhwama (iTrust Fund) ezobhekelela zona ngqo njengoba iningi lazo selidla imbuya ngothi.
UNxesi usho lokhu enkonzweni yomngcwabo kaMichael “Bizzah” Dlamimi ebingoMgqibelo e-Olive Convention Centre, eNorth Beach, eThekwini.
Nasenkonzweni yesikhumbuzo ngoLwesine abeSouth African Masters and Legends Association bakubeke kwacaca ukuthi ukungena kukaNxesi kuzoziqeda nya izinkinga zabadlali bakudala.
“Ukuze silwe ngokuphelele nezibazi zobandlululo kumele sinakekele izingwazi zethu. Laba bantu badlale ibhola kungakabi bikho mali, kanti iningi labo kaliyanga esikoleni.
"Kumele kube nesikhwama esizobhekelela bona ngokuphele- le. Ukudlula kukaBizzah kumele kusikhumbuze ubumqoka bezingwazi zethu.
"Ukuhamba kwakhe akumele sikuzilele kodwa kumele sikuhalalise,” kusho uNxesi.
Lo mngcwabo usetshenziswe yizikhulumi ukukhumbuza abantu ukuthi iChiefs yamanje kayisefani neyakuqala.
UBheki Cele oyiSekela likaNgqongqoshe WezaMahlathi nokuDoba, uncokole ngokuthi uhlale emkhumbuza njalo uBobby Motaung oyiMenenja-jikelele yeChiefs ukuthi kumqoka ukubuyisela le kilabhu emgqeni.
"Uthe isimo seChiefs sibi kodwa singcono kunese-Orlando Pirates ethandwa nguNxesi abemethula kule nkonzo yomngcwabo. Uchaze iPirates njengomkhumbi ozikayo.
Izikhulumi zimchaze njengendoda eqotho nebiwukhathalele umndeni wayo uDlamini.
Lokhu kufakazelwe wukuthi umndeni wakhe waseSobantu eMgungundlovu nowaseThekwini uphume ngobuningi ukuzomphelezela.