ABAFUNDI BASHUKANA KWI-WINTER GAMES ETHEKWINI
BAQHELISWA kwizidakamizwa abafundi ngokuhlelelwa iSouth Africa National Winter School Sports Championships eqale izolo ngeSonto ezosongwa ngoLwesihlanu ezinkundleni ezahlukene zaseThekwini.
Kulo mqhudelwano kugaduliswana emidlalweni eyisi-9 eyahlukene. Phakathi kwayo kukhona ibhola lezinyawo, elomnqakiswano, elombhoxo, i-chess, i-tennis, i-hockey, i-volleyball, ukhokho ne-juskei.
Le midlalo iba minyaka yonke kanti ixhaswe wuMnyango WezeMidlalo kazwelonke oholwa nguThulas Nxesi. Le midlalo nyakenye ibibanjelwe eGauteng.
Inhloso yale midlalo wukuvundulula amakhono entsheni nokugcina abafundi bematasa ngesikhathi samaholidi bangazitholi sebengena kwizidakamizwa ezibhidlangile kuleli njengoba sekubikwa ukuthi sekubhenywa i-whoonga ethakwe ngomlotha wezidumbu.
Umnyango wezemidlalo uhlela imidlalo efuze lena njalo ngamaholidi kuze kuphele unyaka.
Ngokuqala konyaka kuba neyabagijimi, kulandele eyababhukudi kube yile eseThekwini kanti ngokuphela konyaka kuzokuba namaSummer Game.
Imidlalo ye-tennis izodlalelwa eWestridge Tennis Park naseHoy Park kuthi i-netball, i-juskei nokhokho kube seHoy Park, kanti i-volleyball izokuba seUniversity of KwaZulu-Natal (UKZN) eWestville, ibhola lombhoxo lizodlalelwa eGeorge Campbell naseKings Park, i-hockey iseQueensmead, ibhola lezinyawo lizokuba se-UKZN, eHoward College nase-Edgewood kanti indawo lapho kuzodlalelwa khona i-chess ibingakadalulwa. Izinkundla zale midlalo ziqinisekiswe nguKhulezweni “Khura” Buthelezi.
“IKwaZulu-Natal izimisele ngokwenza kahle kule midlalo emuva kokubamba ikhempu eMargate,” kusho uThabo Mofokeng okhulumela uMnyango Wezemidlalo KwaZulu-Natal okuqinisekisile ukuthi le midlalo ihlelwa wuMnyango WezeMidlalo kazwelonke.