I-ASA isabheke lukhulu kuWayde

Ufaniswa nomqansa ongagitshelwa mbongolo

UMENGAMELI we-Athletics South Africa (ASA) u-Aleck Skhosana ufanisa uWayde van Niekerk nomqansa ongagitshelwa mbongolo emuva kokuba ephinde ecisha isikhathi sikaMichael Johnson kwiDiamond League ngoLwesine eLausanne, eSwitzerland.

UWayde obeqala ukugijima ibanga lika-400m ngemuva kokuqopha irekhodi elisha lomhlaba kumaOlympic Game nyakenye eBrazil.

EBrazil uphule u-43:18 kaJohnson wase-United States of America (USA), waqopha u-43:03. Ngeledlule uphinde waphula irekhodi likaJohnson kwi-300m lika30:85 wabeka elisha lomhlaba u-30:81 njengoba ephindile futhi wenza kangcono isikhathi kwiDiamond League.

UJohnson ubeno-43:66 wango- we-1996, wawucisha uWayde wabeka u-43:62.

“Ngineqholo lokuthi akekho okwamanje umsubathi ongakwazi ukumelana noWayde.

"Ngimfanisa nomqansa ongagitshelwa mbongolo ngendlela okunzima ngayo ukumelana naye. Lokho usekukhombisile emijahweni eminingi abe yingxenye yayo.

"Ngibonga kakhulu nakumqeqeshi wakhe. Bayibekile induku ebandla kwezokugijima kuleli yize sisalindele lukhulu kuyena kwazise usemncane ngokweminyaka,” kusho uSkhosana.

Uqhube wathi maduzane bazokhipha iqembu lakuleli eliya eLondon.

Uthe selikhona kodwa kusafanele lidlule kubo bonke abantu ngaphambi kokuba balimemezele kwabezindaba.

U-Anele Dlamini wePhantane noNwabisa Mjoli weHollywood Bets babe yizingqwele zeWaterfall SuperSpar Forest 10km izolo ngeSonto eWaterfall, eHillcrest.

U-Anele uqophe isikhathi esingu-32:41 ebekwe ezithendeni nguPhumlani Mngadi kwathi u-Aphelele Phungula walala isithathu. UNwabisa uqophe u-38:25 elandelwa nguHappiness Mkhize ngo-38:41, endaweni yesithathu kwangena uJanene Carey.

Isiyonke imiphumela yalo mjaho imi kanje, esigabeni esivulelekile kwabesilisa: 1.Anele Dlamini (Phantane) 32:41; 2.Phumlani Mngadi (HV) 32:54; 3.Aphelele Phungula (Bluff) 33:23. Ku-35 kuya ku-39: 1.Garlkai Madawo (CAC) 34:06. Ku-40 kuya ku-49: 1.Bernard Phalatsane (Phantane) 33:27; 2. Jono Edwards (West) 34:46; 3. Donovan van Gelder (PDAC) 37:09. Ku-50 kuya ku-59: 1.Thoerry Pletinckx (Toti) 38:02; 2.Cliff Robbertze (West) 40:06; 3.Ken Culverwell (West) 41:50. Ku- 60 kuya phezulu: 1.Aubrey Roberts (West) 40:43; 2.Mike Rook (Savages) 43:42; 3.Bongani Ndlovu (Zabalaza) 44:43. KumaJuniya: 1.Jabulani Majombozi (Boxer) 39:22.

Kwabesifazane: 1.Nwabisa Mjoli (Hollywood Bets) 38:25; 2. Happiness Mkhize (Nedbank) 38:41; 3.Janene Carey (Boxer) 40:14. Ku-35 kuya ku-39: 1.Teneal Featherby (PDAC) 41:55. Ku-40 kuya ku-49: 1.Janene Carey (Boxer) 40:14; 2.Pat Dammann (Vitality) 43:29; 3.Chantel Nosworthy (DRAC) 46:20. Ku-50 kuya ku-59: 1.Michelle Sim (PDAC) 44:30; 2.Joanne Gibb (IND) 45:50; 3.Yolisile Mwelase (Phuma KZN) 46:50. Ku-60 kuya phezulu: 1.Sheree Kirsten (West) 53:50; 2.Wendy Rook (Savages) 55:22; 3.Frankie Cawdrey (Chiltern) 55:46. KumaJuniya: 1.Kholeka Biyela (Nedbank) 45:50.