UJOYINE I-EAGLES OZALWA NO-TAU

UMDLALI obatshazwa nguPercy Tau weMamelodi Sundowns ujoyine iRoyal Eagles egijima kwiNational First Division (NFD).

ILANGA lithole ukuthi uDumisani Tau ongumfowabo kaPercy usejoyine le kilabhu yezimpunyela zaseThekwini, uSbu noShawn Mpisane. UDumisani ubegijima kwiWitbank Spurs ngesizini edlule kanti uPercy utshele ILANGA muva nje ukuthi ngokwakhe lo mdlali ubaba kakhulu kunaye.

UThemba Mafu ongumnikazi weSpurs utshele leli phephandaba ukuthi i-Eagles ihlabene ngalo mdlali.

Uthi umdedeliswe wukuthi uyazintulela ngakwezomnotho. UMafu uthi uDumisani uyavutha ophondweni lwesobunxele esiswini.

I-Eagles kayisayinisanga nje lo mdlali kuphela, kodwa ifake ema- bhukwini ayo noJomo Mncube osuka kuMthatha Bucks obegaqelwe ngamaZulu FC, uSiyanda Khumalo waseMlazi ophuma kwiMbombela United, uBafana Nhlapo osuka kwiSpurs, uJoshua Sauls obekwiSpurs, uNkanyiso Madonsela obekwiJomo Cosmos, uDiego Brown osuka kwiStellenbosch FC noCleophas Dube naye ophuma kwiStellenbosch.

Laba badlali basayiniswa nje, le kilabhu isanda kuchitha inqwaba kubalwa uKatlego “Killer” Mphela, uPhumelele “Ace” Bhengu, uJabulani “Macokama” Nene, u-Enver Wiltner, uCarlington Nyadombo, uPhilani “Maoti” Shange ukukha nje phezulu.

Umthombo wethu oncikene kakhulu ne-Eagles uthi izikhulu zale kilabhu zijabule kakhulu ngokuthola abadlali abasha njengoba yakhiwa kabusha ukulwela ukunqoba isigaba seNFD. Kuthiwa bakhona abanye okusaxoxiswana nabo.

Imizamo yokuthola uJames Dlamini oyiMenenja-jikelele yeEagles ukuqinisekisa lolu daba kayiphumelelanga njengoba ucingo lwakhe belukhala engalubambi.

URicardo Goss ochithwe yiLamontville Golden Arrows usayiniswe yiReal Kings United.

Umdedeliswe wukuthi uyazintulela...