BABHODLA UMLILO ABEBHOLA LEZIKOLE NGE-SAFA
UDINWE uyaveva uZibuse “Bizzah” Ncube onguSihlalo weSouth African Schools Football Association (Sasfa) KwaZulu-Natal ngokuthinteka kobuholi bakhe ebuholini obusha bebhola lezikole obusanda kwethulwa.
UNcube uthi kungamampunge ukuthi uSmanga Mgenge ongunobhala weSasfa esifundazweni uyingxenye yobuholi obusha besikhashana. Uphinde wakukhahlela ngazo zombili ukuthi kukhona izingxoxo zokubuyisana phakathi weSasfa neSouth African Football Association (Safa).
“Abantu abasihambe ngemuva bayoncetheza kwiSafa nguSteve Phila onguNobhala osamisiwe, u-Innocent Sirovha noDickson Moleko abangamasekela kaMandla Mazibuko onguMengameli wethu. Isigungu esiphezulu seSasfa sizokuba nomhlangano ngoLwesithathu ukubhunga ngalolu daba.
“UMgenge simnxuse ukuba ahlanze iqiniso kulo mhlangano ngokufakwa kwegama lakhe. Okungidina kakhulu wukuthi uMgenge ngiphoqelekile ukumbuza ngale nto ngoba bese ngilokhu ngithola izingcingo ezingapheli. Ungitshele ukuthi uthole ucingo komunye umuntu emnxusa ukuba axhumane noDanny Jordaan onguMengameli weSafa.
“Uthi uyalele lowo muntu ukutshela uJordaan ukuba amthinte ngqo okuyinto athi kayenzekanga. UMgenge akekho ngisho esithombeni esinabantu abathi sebehola ibhola. UJordaan akayeke ukusixova ngisho sesaphuma kwiSafa. Saxoshwa yibona manje ngoba sebeyahluleka ukuphatha ibhola lezikole sebefuna ukwenza iSasfa ingabuseki. UPhila vele umiselwe khona ukuzimatanisa neSafa,” kusho uNcube.
UMgenge uthi ngesikhathi okuthiwa ubesemhlanganweni wobuholi obusha ngaso, ubematasa nemidlalo yeSiyabonga Sangweni Youth Festival and Mayoral Sports Day eqale ngoLwesihlanu yasongwa izolo ngeSonto eDondotha, eMpangeni.