Kuzogadla izembe kwi-Orlando Pirates
Sekulindwe uJonevret abuye eSweden
IZEMBE kubhekeke ukuba ligadle liphindelela kwi-Orlando Pirates njengoba ebuya kuleli sonto uKjell Jonevret waseSweden ongumqeqeshi wale kilabhu ebhacazile ngesizini edlule. ILANGA lithole ukuthi uJonevret ubengekho eNingizimu Afrika ekwelakubo ukuyopholisa kancane ikhanda emuva kokutalajwa yiSuperSport United ngo-4-1 kowamanqamu weNedbank Cup emasontweni amabili adlule eMoses Mabhida Stadium, eThekwini.
Kuthiwa ulindeleke ngoMsombuluko kanti kubhekeke ukuba ahlangane nosihlalo weBucs, uDkt Irvin “Iron Duke” Khoza ukubhunga ngabadlali azobadinga ngesizini ezayo.
Izindaba zokubuya kukaJonevret ziqinisekiswe nguDerek Blackensee ongesinye sezikhulu zeBucs.
“Ngingakuqinisekisa ukuthi uJonevret ubuya kuleli sonto kodwa-ke okuningi ungakubuza kusihlalo, nguyena onezimpendulo,” kusho uBlackensee.
Leli phephandaba lithole ukuthi uJonevret ubuya kuleli sonto nje, belilandela udaba lukaThembela Sikhakhane okuphele isizini edlule enyiwa yisikimu kweZimnyama noNkosinathi Mthiyane obebolekiswe kwiLamontville Golden Arrows ngesizini edlule.
Bobabili laba badlali baphethwe yiProsport International kaMike Makaab.
UMakaab uphendule leli phephandaba ngokuthi akakazi ukuthi kuzokwenzekani ngalaba badlali, konke kuzocaca uma sekubuye uJonevret.
“Ngizohlangana nosihlalo (uKhoza) uma eseqedile noJonevret ngabadlali abadingayo nge- sizini ezayo,” kusho uMakaab.
Ugcizelele ukuthi konke kuzocaca emuva kwalowo mhlangano ukuthi laba badlali bakhona yini ezinhlelweni zeBucs zangesizini ezayo noma kufanele babhekelwe engxenye lapho bengabolekiswa khona ukuthola ithuba lokudlala kwazise basenezinkontileka.
IBidvest Wits iphuce iqatha i-Arrows ilanda umdlali ebimbolekise kuyona, uKnox Mutizwa.
Lo mdlali i-Arrows ibinethemba lokuthi iziTshudeni zizophinda zibaboleke nangesizini ezayo.
Nokho kuvela ukuthi noGavin Hunt uyamdinga ngesizini ezayo. Lokhu kutshelwe ILANGA nguJose Ferreira oyisikhulu esiphezulu seWits.
Uqhube ngokuthi basaxoxisana noSiboniso “Pa” Gaxa oyisitobha ophelelwe yinkontileka emfushane ngokusongwa kwesizini edlule.