UXWAYISWA NGOKUJOYINA I-PIRATES NE-DOWNS
USibiya usafuna ukuzinza kwiBafana Bafana
UXWAYISWA ngobungozi bokuhehwa yizinkunzi zaseGauteng umdlali weLamontville Golden Arrows ovutha engabaselwe osekwenze waheha iso lamanye amakilabhu amakhulu kwiPremier Soccer League (PSL).
UNduduzo “Sulumane” Sibiya ugijime ibhola elihle ngesizini edlule okungamangalisanga uma ehlabana ngomklomelo wokuba ngumdlali omncane onekusasa eliqhakazile ngengcwenga ayikhombise kwiNedbank Cup abakhishwe kuyona yi-Orlando Pirates emdlalweni owandulela owamanqamu.
USibiya uzuze iNedbank Cup Most Promising Player Award emcimbini wePSL wokuklomelisa abadlali abenze kahle emiqhudelwaneni eyahlukene yale nhlangano ngoMsombuluko ebusuku eSandton Convention Centre yodumo eGoli.
Lo mdlali kuvele ngesizini edlule ukuthi ufunwa yiMamelodi Sundowns ehwebelanayo neArrows ngabadlali njengoba kwenzeka nakwiPirates enobudlelwano obuhle nezikaMato Madlala okunguyena yedwa owesifazane ongumnikazi wekilabhu kanobhutshuzwayo egijima esigabeni esikhulu sakuleli.
UBheka Phakathi obengukaputeni we-Arrows eminyakeni edlule ngaphambi kokuthathwa yiBucs, uyala uSibiya ngokuzinza kuBafana Bes’thende okwamanje, angajahi ukuya eGauteng. Uthi lo mdlali kusamele aqine kahle ukhakhayi, angaphuthumi impilo ebukeka iwubukhazikhazi emakilabhini aseGauteng azwakalise ukuthi ishaye uBongi Ntuli.
UNtuli ushiye i-Arrows ebatshazwa kumasizini amathathu adlule wajoyina iMamelodi Sundowns emphilisa ngokumshova lapho ithanda khona.
Ngasekuqaleni kwesizini edlule, uThembela Sikhakhane obeyinjini ye-Arrows uyishiyile le kilabhu, wajoyina iBucs okuphele isizini esehlala ezihlweleni emidlalweni yayo.
Yingalezi zizathu-ke uPhakathi ethi: “USibiya unekusasa elihle kodwa kusamele aqinise ekukhuliseni ibhola lakhe kwiArrows, alalele abaqeqeshi, azehlise kubalingani bakhe okuyibona abamtshalela kahle ibhola. Ngikholwa wukuthi kusamele adlale okungenani amasizini amabili kwi-Arrows ukuqina kahle ukhakhayi.”
USibiya ekhuluma neLANGA uthe nakuba ehlabane ngalo mklomelo kodwa usanenselelo yokuzigcina eqatha njengoba esahluleka ukumelana nemizuzu engama-90 yomdlalo oshisayo. Uthi isifiso sakhe esikhulu njengamanje wukuzakhela igama nakakhulu kwi-Arrows okuzokwenza abizwe njalo nakwiBafana Bafana asanda kuqokelwa kuyona idlala kwiCosafa Castle Cup ebimuva nje eNorth West.
Kulo mcimbi uLebogang Manyama ongukaputeni weCape Town City ushanele imiklomelo enqoba emithathu emqoka kubalwa owePSL Footballer of the Season, i-Absa Premiership Player’s Player of the Season nowokuhlohla amagoli amaningi kwi-Absa Premiership.
Kule kilabhu kubuye kwahlabana u-Aubrey Ngoma ngemiklomelo emibili yeTelkom Knockout Player of the Tournament noweAbsa Premiership Midfielder of the Season.
UGavin Hunt ongumqeqeshi weBidvest Wits eyizingqwele zeligi uqokwe njengovelele kwezokupheka ikilabhu ngesizini edlule, kwathi uDarren Keet ovimbela iziTshudeni waba ngunozinti ovelele kanti ukaputeni wale kilabhu uThulani “Tyson” Hlatshwayo udle ubhedu njengesitobha esivelele ngesikhathi uPhakamani Mahlambi enqoba owokuba yi-Absa Premiership Young Player of the Season.
UDaine Klate osenqobe iligi namakilabhu ehlukene amahlandla amaningi ukubedlula bonke abadlali bakuleli, uqokwe njengeMTN8 Last Man Standing ngeqhaza alibambile eshaya amagoli amabili asheshayo iziTshudeni zibhuquzisa iSundowns ngo-3-0 kowamanqamu walo mqhudelwano wokuvula isizini.
U-Abbubaker Mobara uphakamise ifulegi lePirates enqoba oweNedbank Cup Player of the Tournament kwathi uSiphiwe “Shabba” Tshabalala weKaizer Chiefs wahlabana ngokuhlohla igoli elivelele ngesizini edlule.