UGXEKA EYOKUTHATHA IZINQUMO NGENTUKUTHELO
UNXUSE amalunga eSouth African Communist Party (SACP) ukuba angathathi izinqumo ethukuthele nge-African National Congress (ANC), uMnu Cyril Ramaphosa oyisekela-mengameli wezwe ne-ANC.
Ubekhuluma engqungqutheleni yeSACP ye-14 eBoksburg, eKurhuleni, eGauteng, izolo ngoLwesithathu. Uthe kumele leli qembu lime kancane, licabangisise ngaphambi kokuthatha isinqumo sokuxebuka kwi-ANC. “Ngiyazi ukuthi kunesiphakamiso sokuba i-SACP ingenele ukhetho ngokuzimela kodwa kangiboni lokhu kuyisinqumo esiphusile.
"Kubalulekile ukuba singathathi isinqumo sisadiniwe ngokwenzeka kwi-ANC. Singcono sibumbene kunokwehlukana,” kusho uMnu Ramaphosa. Uthi ukuxebuka kweSACP kwi-ANC, kuzojabulisa izitha nalabo abangayifuni inqubekela phambili - kumadlelandawonye. Uthi sekukaningi kuba nezigigaba ezifaka ingcindezi ebudlelwaneni be-ANC ne-SACP kodwa bazinqobe.
“Nangesikhathi kubulawa uChris Hani kwakucatshangwa ukuthi kuzoba noqhekeko, kodwa kunalokho sakwazi ukuhlangana saqhubekela phambili. Nalezi zingqinamba ezikhona singakwazi ukudlula kuzona sibumbene, inqobo nje uma sizokwazi ukugudluza labo abangamazambane abolile abalwa neqembu," kusho yena.
UMnu Ramaphosa ukhuluma nje, bese kunemibiko esisabalele ethi iSACP isezinhlelweni zokuxebuka kwi-ANC ikhankasele ukhetho ngokuzimela ngowezi-2019. Bekuneminye imibiko ethi izolinda ingqungquthela yokukhetha ubuholi be-ANC ngoZibandlela (December) ngaphambi kokuthatha isinqumo ngekusasa lokuzimela. Kuthiwa konke kulele kozodla umhlanganiso kule ngqungquthela njengoba yona ifuna kube nguMnu Ramaphosa othatha izintambo kuMnu Jacob Zuma osephenduke iqaqa kwiSACP.
UMnu Ramaphosa uphinde wanxusa amakhomanisi ukuba angathuli uma ebona izinto zingahambi kahle ezweni. “Ngeke ngithule, kakuvumi, ngizokhuluma. Ukuthula ngeke kusisize ngalutho sibona izwe lithathwa ngabathile ngenhloso yokuhlomulisa umndeni owodwa. Kalupheli usuku kungabikwanga ngendlela izinkampani zikahulumeni ezisingethwe ngayo.
"Inkohlakalo inuka phu kulezi zinkampani ngakho singathula kanjani umnotho wethu ushabalala sibhekile?," kusho uMnu Ramaphosa. Uthe umbiko kaNobhala-jikelele we-ANC, uMnu Gwede Mantashe - awethule engqungqutheleni yemigomo yeANC - ubuqukethe izinto ezibalulekile, kumele bawusukumele.
“Yingakho kumele siyisungule ngokushesha ikhomishini ezophenya ngokulawulwa kombuso ngesiqhebezabuqama,” kusho uMnu Ramaphosa enanelwa yihlombe. Uphethe ngokuthi labo abazothinteka enkohlakalweni nasekudliweni kwemali, kuzomele umthetho usebenze futhi ibuye imali yabakhokhi bentela.
Ukhale ngokuthi ngaphandle kwezinkampani zikahulumeni neminyango ebucayi, iyalawulwa ngesiqhebezabuqama. Le ngqungquthela eqale ngoMsombuluko iphothulwa kusasa ngoLwesihlanu, kanti ngaphambi kokuba iqale, amakhomanisi akubeke kwacaca ukuthi kawafuni uMengameli Zuma akhulume kuyona.
KONKE KULELE KOZODLA UMHLANGANISO.