Umsindo ngepulazi elithinta iSilo
Kutshalwe kulona undlunkulu
AYAVEVA amalunga ekomiti i-Ezinyambe Community Trust akhala ngokudliwa kwepulazi lawo, iNooitgedacht eliKwaShoba eVryheid, enyakatho-mpumalanga yeKwaZulu-Natal, athi selidayiselwa iSilo samaBandla, uGoodwill Zwelithini kaBhekuzulu.
La malunga ayimindeni eyisi-7 okubalwa kuwona abakwaThabethe, abakwaMdlalose, kwaNzuza, kwaNgema nabakwaZungu, athi afake isicelo sokubuyiselwa umhlaba wokhokho bawo ngowezi-2011 emnyangweni wezemihlaba, okuthe ngowezi-2013 saphasa.
Umnyango uwathengele leli pulazi kumnikazi walo, uMnu Kowie Lombard. Athi leli pulazi selikhokheliwe ama-90% emali ebizwe nguMnu Lombard, sekusele i-10% ngaphambi kokuba umhlaba kube ngowawo ngokugcwele.
Athi njengoba ipulazi selithengiwe, uMnu Lombard akasahlali kulona, wathi mawaligade ngoba abantu bayaganga kungenzeka balithole selicekeleke phansi uma engalinaki.
La malunga e-Ezinyambe, athi mhla ziyisi-7 kuNtulikazi kwephezulu, abone sekufika iSilo singazange sixhumane nawo kodwa sikhulume nosihlalo wawo, uMnu Alias Buthelezi, osewaphendukele esiswini njengotshwala, ongasawazisi lutho oluqhubeka epulazini.
Unobhala waleli komiti, uMnu Thabani Nzuza, uthi kwehlula ngisho sebethi bambizela umhlangano uMnu Buthelezi bafuna ukukhuluma naye. Uvele abhoke ngolaka maqede agijime aye emaphoyiseni athi bayamhlasela, ngokusho kukaMnu Nzuza.
Uthi ngesikhathi kufike iSilo, babone ngezimoto zingena epulazini bengazange batshelwe lutho.
“Uma sesinikela khona siyobheka ukuthi kwenzenjani, sifike usihlalo ekhuluma neSilo thina sahlaliswa etendeni bengafuni nokuba sisondele sizwe inkulumo yabo. Uma sesizwa ngomnikazi wepulazi, uthi kuthiwa makangabe esasivumela ukuba singene epulazini njengoba selizothathwa yiSilo.
“NgoLwesibili sibone sekukhona enye imoto emile epulazini, uma sithi siyoyibheka savinjwa ngamaphoyisa athi kuthiwe kasisavumelekile ngoba indawo yethu isiyiNational Key Point, esingakwazi ukuthi kushiwo ngaliphi njengoba singakaze siyibone i- government gazette ekushoyo," kusho uMnu Nzuza.
Uthi abalelwa esi-7 amapulazi abuyiselwe kubantu ngaphansi kwekomiti le-Ezinyambe Community Trust, uMnu Buthelezi angusihlalo walo. Kulawa amanye amapulazi, abantu okumele ngabe bayahlomula, uthi kabahlomuli njengoba uMnu Buthelezi esewanikeze abanye abantu.
“Siyabona ukuthi nakuleli lethu usefuna ukwenza into efanayo njengoba esesikhiphela ngaphandle enza izinto yedwa. Usanda kuqaqa othayela bamahhoko ezinkukhu wabahambisa kwakhe engaxhumene nathi.
“Kumanje sesimvulele icala ngokwenza lokhu. UMnu Buthelezi ethintwa ngalolu daba, uvele wabhoka ngolaka wathi ngeke akhulume ngeSilo emaphepheni.
Uthi ofuna ukuzwa lolu daba makaye kuyena kuyokhulunywa umlomo nomlomo, ngeke ahlambalaze isilo ocingweni.
“Baqamba amanga labo bantu, kangibazi nokubazi kabasilo ikomiti.Ngeke ngihlambalaze iSilo futhi kayikho into engizoyikhuluma nomuntu engingamazi,” kusho uMnu Buthelezi evala ucingo.
Esephinda eshayelwa, uvumile ukuthi uyabazi laba bantu waphinda wavala ucingo wangabe esalubamba esethintwa okwesithathu.
Okhulumela indlunkulu, uMntwana Thulani Zulu, uthe kuyiqiniso ukuthi iSilo siyile kuleli pulazi. Uthi kulona kutshalwe indlovukazi uKaMdlalose ezala iNgomyama uSolomon esayakhothama.
“ISilo sijwayele ukuya kuleli pulazi siyobeka izimbali edlinzeni lakhe. Sibe sesikhuluma nabantu emuva kokuthi usihlalo wekomiti esitshele ukuthi banikezwa umhlaba bese bengawusebenzisi, bakhe kuwona.
“Besikhuza lowo mkhuba sithi abantu umhlaba mabawusebenzisele ukuzithuthukisa, hhayi ezinye izinhloso. Labo bantu banamanga, kabasibona abekomiti, ngisola ukuthi yilaba usihlalo abekhala ngabo ethi bafuna ukuthatha umhlaba ngenkani,” kusho uMntwana.
Okhulumela amaphoyisa KwaZulu-Natal, uColonel Thembeka Mbhele, uthi likhona icala lokuntshontsha elivuliwe kodwa kakukaboshwa muntu njengoba kusenziwa uphenyo.
UMnu Lombard uthi nakuba iSilo sifikile epulazini kodwa akezwanga ukuthi sifuna ukulithenga kubantu. Uthi into ayizwile wukuthi iSilo kuthiwe sizothumela onogada bagade ipulazi njengoba kunokungaboni ngasolinye phakathi kukasihlalo wekomiti nabantu, kunovalo lokuthi bangase bangene balimaze impahla.
UMnu Zweli Xaba woMnyango wezeMihlaba KwaZulu-Natal, uthe lolu daba belungakafiki kubona. Uthi noma ngabe abantu bayaku- zama lokhu yinto engeke ize iphumelele ngoba umthetho kawuvumi ukuba babuyiselwe umhlaba bese bewudlulisa. Umuntu owenza lokhu, kumele abhekane nengalo yomthetho.