Iqembu lidinga uxhaso
Liya e-Italy
SELILELE kumSamariya onesihawu - ongaziwa ukuthi uyoqhamuka kuziphi izinkalo - ithemba leqembu lesicathamiya esithakwe nezinye izinhlobo zomculo, elidinga uxhaso lwemali njengoba liya eSicily nakwamanye amadolobha amane e-Italy ngoMgqibelo.
IYoung Mbazo enamalunga ali-10, okungabafundi basemanyuvesi ahlukene, ithi ifisa ukuthola uxhaso komasipala baKwaZulu-Natal ngoba amalunga ayo adabuka kulesi sifundazwe. Sekungokwesibili ivakashela phesheya.
Leli qembu lisungulwe ngabazukulu beLadysmith Black Mabazo. UBabuyile Shabalala (31), ongomunye wabasunguli, utshele leli phephandaba ukuthi leli qembu liya e-Italy nje, liyogubha i- festival yamagugu khona, lizohamba inyanga yonke. “Siqale ukuya e-Italy ngoNtulikazi (July) nyakenye. Simenywe khona ngoba kubonwe i- video yethu kwi-Youtube sinandisa.
"Njengoba simenyiwe futhi, lokhu kutshengisa ukuthi bayakuthokozela esikwenzayo.
"Siyiqembu siyajabula ukuthola leli thuba lokuyonandisa ngaphandle kwasekhaya.
"Lokhu kusho ukuthi sihamba ezinyathelweni zomkhulu bethu. Uma sibuya sihlela ukuya ezikoleni siyotshengisa abafundi ukuthi senzani phesheya.
"Sinxusa uMnyango wezeMfundo KwaZulu-Natal nowezobuciko namasiko ukuba ingenelele ngoba sifuna ukufundisa intsha ngesiko lethu,” kusho uBabuyile