Kasisuki isithombe sesibhicongo saseCiskei
Imashi yayiholwa nguRamaphosa, uHani...
YIZE ziziningi izigameko zezepolitiki ezinyantisa igazi ezike zenzeka eNingizimu Afrika kodwa esokubulawa kwamalunga e-African National Congress (ANC) angama-28 esibhicongweni saseBhisho, eCiskei mhla ziyisi-7 kuMandulo (September) we-1992 kubukeka kungelula ukuba silibaleke emqondweni wesekela likamengameli wezwe, uMnu Cyril Ramaphosa kwazise inganono yayizamula likhona lapho - lasinda.
UMnu Ramaphosa - owayengunobhala-jikelele we-ANC ngaleso sikhathi - wayeyingxenye yala malunga e-ANC ayelinganiselwa ezi80 000 ayemashela ukuba kuphele ngendaba yokuzimela geqe kweCiskei ingene ngaphansi kweNingizimu Afrika - njengoba yayithole uzimele geqe owenqatshwa yiNkosi Mangosuthu Buthelezi KwaZulu.
UMnu Ramaphosa wayehambisana namanye amalunga e-ANC naweSouth African Communist Party (SACP) okubalwa kuwona uMnu Chris Thembekile Hani, uSteve Tshwete noMnu Ronnie Kasrils.
ICiskei yasungulwa ngowe-1961 ngaphansi komthetho weBantu Authorities Act, 1951 emuva kokuba uhulumeni waseNingizimu Afrika washaya imithetho elahlela abamnyama ezindaweni zasemakhaya ezazingenayo impucuko njengasemadolobheni.
Ngowe-1972, iCiskei yayisinikwe uzimele geqe. Lokhu kwahambisana ngqo nesenzo sikahulumeni waseNingizimu Afrika sokuphoqa amaXhosa ukuba ayombondelana eCiskei - njengeqhinga lokufuhlela abantu ezindaweni ezingenantuthuko.
Mhla zizine kuZibandlela (December) we-1982, iCiskei yayisiyizwe nje elizimele, lokho kuhlonishwa kuphela wuhulumeni waseNingizimu Afrika nezinye izizwana zabampisholo ezazizimele njengeBophuthatswana neVenda.
Indlela yokufuhlela abamnyama ezindaweni zasemakhaya yayiwumgogodla wobandlululo kodwa kuthe kusukela ngowe-1990 kuya kowe-1994 kwaba nezingxoxo phakathi kukahulumeni waseNingizimu Afrika ne-ANC ukuba kuqedwe ngobandlululo olwalubhekiswe kwabampisholo.
UMnu Ramaphosa wayehola ithimba le-ANC ezingxoxweni. Njengoba kwase kuntwela ezansi ngokuthi zonke izinhlanga zivote kuleli, i-ANC yayifuna ukugqugquzela amalunga ayo eCiskei.
Nokho kwacaca ukuthi kayibuzanga elangeni ngoba umholi waseCiskei, uBrigadier Oupa Gqozo, washaya phansi ngonyawo wavimba ngowe-1991. Wasungula i-African Democratic Movement (ADM) ukuvimba i-ANC eCiskei.
NgoZibandlela wawo owe-1991 uBrigadier Gqozo wayeyingxenye yezingxoxo zeConvention for a Democratic South Africa (Codesa) okwakuhlangene kuyona uhulumeni weNational Party (NP) namaqembu ehlukene - ayengekho kuhulumeni - kudingidwa ukuba kwenziwe umthethosisekelo omusha futhi kuwelwe ibhuloho lobandlululo kuphikelelwe entandweni yeningi.
NgoNdasa (March) we-1992, uBrigadier Gqozo wasola i-ANC ngetulo lokumketula kwathi ngo- Ncwaba (August) walowo nyaka wavimba amalunga e-ANC ayemasha esuka eKing William’s Town (eNingizimu Afrika) efuna ukungena eCiskei.
Zintathu kuMandulo, i-ANC yathumela uhlu lwezikhalo kuMengameli Frederik “F.W.” De Klerk ifuna ukuba agudluze uBrigadier Gqozo afake ubuholi besikhashana obabuzovumela intando yeningi eCiskei kodwa wenqaba (uMnu De Klerk) ngoba ethi iCiskei kayikho ngaphansi kweNingizimu Afrika.
Ngaleso sikhathi izingxoxo zasezimile, i-ANC isihoxile emuva kwesibhicongo saseBoipatong - yayisola yena uMengameli De Klerk ngokuvubela udlame. Yabe isihlela ukhukhulelangoqo wemashi eyayiqonde ukuba igwinye iBhisho bese iphoqa uBrigadier Gqozo ukuba esule.
UBrigadier Gqozo wafuna incwadi yenkantolo ephikisana naleyo mashi, imantshi yanquma ukuba ibe khona kodwa ibe seIndependent Stadium ngaphandle kwaseBhisho. I-ANC kayivumelananga nalokho. Mhla ziyisi-7 kuMandulo, amalunga alinganiselwa ezi-80 000 e-ANC ahlangana ngaphandle kwaseBhisho, ekhombisa ukungaphambisani nhlobo noBrigadier Gqozo kodwa angangena ngaphakathi - eBhisho.
UMnu Ramaphosa nozakwabo - uMnu Hani, uMnu Kasrils noMnu Tshwete - yibona ababehola le mashi, eyayingakhombisi inhlese yodlame. Kwafakwa ucingo olusansingo emngceleni weNingizimu Afrika neCiskei ukunqanda abamashi ukuba bangene eBhisho.
UMnu Kasrils nguyena owayinyathela emsileni ehola iqeqebana labamashi bazama ukunqamula kulolu cingo bawelele eBhisho, amasosha eCiskei Defence Force adedela inhlamvu ngezibhamu eziyimishini ezishintshayo kwashona amalunga angama-28 e-ANC kwalimala angaphezu kwangama-200.
Zingaphezu kwama-425 izinhlamvu ezaqhuma ngalolo suku esikhathini esingangemizuzu emibili nengxenye. Kwafa nesosha elilodwa. Kwatholakala ukuthi izwi lokuba kudutshulwe laphuma kuColonel Vakele Mkosana, okubikwa ukuthi watshela amasosha akhe ukuthi ayahlaselwa, kwahlanganiswa iKhomishini kaGoldstone eyaphenya ngalesi sigameko, iJaji Richard Goldstone lasola uGqozo ngokwalela abantu baseCiskei ukuba bazibandakanye kwezepolitiki ngokuthanda kwabo.
Lamsola nangesihluku esakhonjiswa ngamasosha akhe. Lakuchitha ukuzivikela kwakhe ngokuthi abamashi badubula kuqala. Kwatholakala ukuthi isosha elafa ladutshulwa nguzakwabo.
Ijaji labe selithi kumele uGqozo nabathintekayo esibhicongweni bathathelwe izinyathelo ezinqala. Lasola noMnu Kasrils ngobudedengu eholela abamashi oPhathe ukuba beqe ucingo, bechukuluza amasosha.
Mhla ziyisi-8 i-ANC yakhipha isitatimende ifuna uGqozo adilizwe ekubeni ngumholi waseCiskei, kwesulwe noSection 45 of the Ciskei National Security Act owawunqabela abantu ukuba bazimbandakanye kwezepolitiki ngokukhululeka, kususwe nezobunhloli zezombutho wezempi waseNingizimu Afrika eCiskei.
Lesi sibhicongo saholela ekubeni ziqale phansi izingxoxo phakathi kwe-ANC nohulumeni weNP.