UTHANDO LWEMFUYO LUMNIKEZE UMCEBO
UTHANDO lwemfuyo lumenze walaxaza umsebenzi obumholela kwa-Illovo Sugar owesilisa waseMbumbulu, eningizimu yeTheku waqala ibhizinisi lezinkukhu. UMnu Ben Zungu (49), ongumnikazi weHamashe Farming - okuyinkampani ekhiqiza izinkukhu zenyama namaqanda - uthi akaziboni eyofuna umsebenzi.
Akagcini ngokukhiqiza izinkukhu namaqanda kodwa ubuye aqeqeshe intsha enentshisekelo yokungena ebhizinisini lemfuyo. Ekhuluma neLANGA, uthe leli bhizinisi uliqale ngowezi-2009 engenalo ngisho isenti ephaketheni - kanti kuthe uma izinto ziqala ukuhlangana, wesula emsebenzini ngowezi-2010.
Elanda ngosizi lwakhe, uthi kudingeke ukuba aboleke u-R500 okuyiwona athenge ngawo izinkukhu zokuqala. Uthi lezi zinkukhu ubezifake emjondolo abezakhele wona egcekeni lakwakhe.
“Sengibona ukuthi imali iyangena, ngiqhubekile ngagcina se- ngizitholela indawo enkudlwana ngenhloso yokuzandisa. Ngingcine senginemakethe yami okungabantu basendaweni, othisha nasezimpeshenini.
“Imali ebengiyenza lapho ibingondla mina nomndeni wami. Ngibe sengimyekisa umkami emsebenzini njengoba bese ngidinga isandla sesibili, umsebenzi usumningi kakhulu. Ngikhuluma nje izinkukhu esezikhona zili-120. Kulezi zenyama kuyenzeka nginqume ezili-30 nangaphezulu ngosuku kuncika ema-odeni asuke ekhona ngaleso sikhathi,” kusho uMnu Zungu.
Uthi kumanje useqeqesha abantu abafisa ukungena kulo mkhakha wokufuya izinkukhu. Uqeqe- sho uthi luthatha izinsuku ezimbili njengoba eqala ngokufundisa ngenkukhu kusukela iseyichwane kuze kube isikulungele ukuya emakethe.
Uthi uphinde abafundise nangebhizinisi lazo ukuthi liqhutshwa kanjani nangemijovo esetshenziswayo. Umuntu osefunde waqeda unikwa isitifiketi.
“Kumanje ngilungiselela ukuqeqesha intsha yalapha eMbumbulu ngokulekelelana ne-Agri-Seta. Lolu qeqesho luzoqala njengoba kuzophela uNtulikazi (July),” kusho uMnu Zungu.
Uthi useqashe abantu ababili ngokugcwele, okuyibona abamlekelelayo ngokuhlinza izinkukhu nokuziphakela nomunye oyitoho okwamanje.
Ugqugquzela intsha ukuba ingahambeli kude nalo mkhakha kwazise unemali futhi kawudingi nenqwaba yezitifiketi ukungena kuwona. Uthi indlela ibuzwa kwabaphambili ngakho abantu abasha mabazihluphe ngokuthola ulwazi oluzothuthukisa impilo yabo.