Makuzuze umphakathi ngezimbiwa
MHLELI: Kwelakho iphepha lesizwe odabeni oluthi “Adinekile Ngemigodi Yemayini, 29 June 2017, Ikhasi 9” ngithi mangiphefumule njengomele inhlangano yabangena kwezimbiwayo, ikakhulu osomabhizinisi abamnyama abasafufusa nemiphakathi enomnotho wezokumbiwayo.
Impela sikubona kulichilo lokhu enibike ngakho odabeni lapho ikhansela lendawo, uMnu Mdititi Ntombela, eNdilana, eVryheid, lenze isivumelwano nosomabhizinisi ozimele uMnu Dave Vosloo ngokuzohlonza izimbiwa okungamalahle endaweni eyakhelwe wumphakathi ngaphandle kokubonisana nawo.
Kuyaye kufakwe isicelo emnyangweni wezokumbiwayo ukuthola imvume ebizwa ngele-exploration permit bese umphakathi owakhele indawo waziswe ngohlelo lolo, kubhekelelwa inhlalo nemihlomulo. Uma indawo abahlala kuyona abantu ithuthukiswa, kuningana phela okuye kuqikelelwe kubalwa nokugula okungadalwa wukumbiwa kwendawo njengoba sibona namanje ziziningi izinkampani ezihlawulayo ngenxa yokugula kwabantu bekhungathwa yi-Tuberculosis (TB), esibangwa wukuhogela umoya namakhemikhali ezimayini. Kuyisifiso sethu njengenhlangano ukubona kunokubambisana kuzona zonke izinhlaka uma kunohlelo olufana nalolu oluhlongozwayo, ikakhulu kulandelwe imithetho nenqubo kahulumeni ngaphansi kwalo uhlelo lwezimbiwa.
Siyakholwa nokho ukuthi njengoba lolu hlaka lwethu seluzoqala ukusebenza lungene nasemiphakathini bazosizakala abantu ukuze imiphakathi ingazitholi ihhahhanyezwa ngondlovukayiphikiswa futhi nemihlomulo ingagcini ihamba yonke emiphakathini eyakhe kulezo zindawo ezisuke sezihlonzwe njengeziqukethe umnotho. Mnu Thulani Ngubane, uSihlalo: SAMINING ASSOCIATION