SINGIGEZE IGILO LESI SIHLOKO
MHLELI: Waze wabatshela esihlokweni “Ngeke ulunge esithenjini uma uyipigogo”. Ngizwe ngithokoza ngaphakathi, kangazi sengiyiphindaphinde kangaki le ngosi ngiyifunda selokhu ngithenge ILANGA ngenxa nje yobumnandi bamaqiniso aphakathi engosini yakho. Eqinisweni bengiyaye ngithi uMhleli uqinisa isibhaxu uma ebhekise ngakithi besilisa kanti hhayike usungiphendulile Mkhatshwa ekutheni udedela isibhaxu nxa zonke ngale kokuthi ngubani obhekise kuyena. Bayobe bayizithulu uma bengathi kabezwanga ontabakayikhonjwa ngoba phela iqiniso linjalo, kalikaze lehla kamnandi. Engikuthandayo wukuthi batshelwa ngumuntu ozwakala eyiphila impilo yesintu. Obengazi ngempilo yasesithenjini useyayazi, obengazi ngobubi nobuhle besithe- mbu useyazi manje uma elifundile ILANGA. Abantu mabayeke ukulokhu becasha ngokuthi ukube ngangazi ngangingeke ngizifake esithenjini ngoba senichazeliwe ukuthi ziyaphenduka laphaya njengoba uMhleli weLANGA obuye azibize ngeqhikiza lomakoti, wozendazamshiya, amaqhasha emijendevu nomabuyemendweni eseniphe isifundo samahhala nje. Ngithanda kakhulu umbuzo obabuze wona mhleli la uthi: “Seniqale nini ukuthanda isithembu?” Kangazi-ke we qhikiza ngibona sengathi laba bantu bakho bathanda ubukhazikhazi nje hhayi isithembu qobo njengoba besho. Phela kabalufuni olubabayo, nabu nobuvila buthe bhe. Singigeze ngaphakathi lesi sihloko. Petrus “Umzukulu kaGogo” Radebe, Emadadeni ENEWCASTLE.