Uzofihlwa ngoMgqibelo umculi
SEKUPHINDE kwawa enye insika yeqembu lomculo wombhaqanga, iSoul Brothers, uBethwell Ray Ngu bane (51) obe n g umgqugquzeli walo kusukela lisungulwa.
UNgubane ushonele esibhedlela iCharlotte Maxeke Hospital, eGoli, ngoMgqobelo emuva kokuphuthunyiswa khona exinwe wukugula okungadalulwanga.
Okhulumela umndeni wakwaNgubane, uMnu Paul Zikhali, uthi uBethwell uzofihlwa ngoMgqibelo emathuneni asekhaya kubo Obanjeni, eMthunzini enyakatho yeKwaZulu-Natal emini emuva kwenkonzo ezoba sekhaya ngehora lesi-9 ekuseni.
Izolo ngoLwesithathu bekunenkonzo yesikhumbuzo sakhe eKopanong Hall, ekuLuthuli noMain Street eDobsonville, eSoweto, lapho izikhulumi zishiyelane khona inkundla zincoma igalelo lakhe kwezomculo kuleli ikakhulukazi kwiSoul Brothers.
Kulindeleke ukuba iSoul Brothers imculele emngcwabeni. UMoses Ngwenya ongumholi wayo uthe: “Sife olwembiza ngoBethwell. Ubeyinjini yeqembu. Yonke impumelelo yalo ibilele kuyena. Akwehlanga lungehlanga kwaNgubane. Sizobe sikhona siyoyibeka insizwa.”
UNgubane ubeyivulandlela leSoul Brothers kusukela iqala ukuzimela ngonyaka we-1980, ubu- bona ngaye ezweni lonke jikelele uma kuzofika iSoul Brothers ehamba ngekhumbi ebomvu ebhalwe igama leqembu, ithwele izipikha, isho ngezingoma zeSoul Brothers.
Kamuva nje ubesawenza lo msebenzi kepha esengumakhi wezitudiyo, aphinde aphrojuse amaqembu omculo. Ubephinde asebenzisane noMzwakhe Mbuli emsabalalisela umculo wakhe.
Ayikhulunywa ekankosikazi ngoba ubengenaye kepha izingane kuthiwa mayebabo! Intokazi ashone ehlala nayo nguNkz Phume Nyawo. Nyakenye ushiywe nguyise. ISoul Brothers isilahlekelwe ngabaculi bayo abaningi esingabala kubona uDavid Masondo, uPopi Sosibo, uZakhele Mchunu, u-American Zulu nabanye.
Kwenzeka lokhu nje, kusakhalwa endimeni yomculo kamasikandi ngokubulawa ngentululwane yezinhlamvu kukaMandla “Menziwa” Biyela (39) obesebenzisana kakhulu nomasikandi omunye wabo okungu-Ali Mgube. UMandla ubulawe eSoweto, eGoli ngeSonto.