Lisavulekile ithuba lokuya eLondon
I-ASA ithi abagijimi bangaliphonsi ithawula
UKUSHAYELE elikhulu ihlombe uSello Mokoena onguMengameli weKwaZulu-Natal Athletics (KZNA) ukuqokelwa kukaJenna Challenor eqenjini laseNingizimu Afrika eliya kwi-International Association of Athletics Federation (IAAF) World Championships ezokuba ngoNcwaba (August) eLondon.
Kuzokhumbuleka ukuthi uMokoena wakhombisa ukungathokozi ngesenzo sika-Irvette van Zyl obeseqenjini lama-Olympic nyakenye eBrazil.
U-Irvette kwathi sekusele izinsuku ezintathu ngaphambi komjaho wamemezela ukuthi ngeke esakwazi ukugijima ngenxa yokulimala.
Lo mgijimi wabe engaqali ukuhamba neqembu bese ekhala ngokulimala.
UMokoena samphatha kabi isenzo sika-Irvette kwazise uJenna wavaleleka ngaphandle kodwa esenzile isikhathi sokuya eBrazil.
UMokoena ekhuluma neLANGA uthe:
“Kuyisibusiso kwiKZNA ukuba khona kukaJenna eqenjini lesizwe.
"Ngiyamazi uyazimisela. Nginethemba lokuthi uzokwenza kahle.
"Usanda kungena isibili kwiTwo Oceans Marathon nonyaka kanti unesikhathi esihle kwi- marathon asenze phesheya kwezilwandle.”
Uqhube wathi uyalithemba iqembu lakuleli ukuthi lizokwenza kahle njengoba lithakwe ngabasubathi abanesipiliyoni nabasha. Kubona kukhona uWayde van Niekerk, uCaster Semenya, uLuvo Manyonga noSunette Viljoen ababuye nezindondo eBrazil.
“Omunye umsubathi enginethemba lokuthi uzongena uma sekumenyezelwa iqembu lokugcina ngu-Anaso Jobodwana obuye nendondo yethusi ngowezi-2015 eChina.
"Ngesikhathi kubuywa eChina uJobodwana walimala kanti akakalulami ngokugcwele. Uma engangenanga kanginavalo ngoba usemncane usazokwazi ukuba yingxenye yama Commonwealth Game ngonyaka ozayo,” kusho uMokoena.
I-Athletics South Africa (ASA) ithe izomemezela iqembu lokugcina ngomhla wama-23 kwephezulu kwazise kusekhona abasubathi abasazama ukwenza izikhathi zokuya eLondon.
I-ASA ithi nakulaba abakhona kusengenzeka abanye bakhishwe.
Ngaphandle kwabasubathi ababuye nezindondo nyakenye eBrazil, kukhona noMapaseka Makhanya ozokube enza iMarathon.
UMapaseka ngomunye wabasubathi owakhala kakhulu ngokusala ngaphandle eqenjni lama-Olympic nyakenye yize wabe esenzile isikhathi.
“Abangakazenzi izikhathi mabangaliphonsi ithawula, lise- khona ithuba. Kumele basebenze kanzima,” kusho u-Aleck Skhosana onguMengameli we-ASA.
Selilonke iqembu leNingizimu Afrika eliya eLondon lididiyelwe kanje, kwabesilisa: Akani Simbine (AGN), uThando Roto (AGN), uWayde (AFS), uClarence Munyai (AGN), uNcilini Titi (US), u-April Lusapho (EPA), uSibusiso Nzima (CGA), uDesmond Mokgobo (CGA), u-Antonio Alkana (WPA), uLuvo (AGN), uRuswahl Samaai (CGA), uZarck Visser (CGA), uKhotso Mokoena (AGN), u-Oratio Cremona (AGN), uJaco Engelbrecht (CGA) noRocco Van Rooyen WPA.
Kwabesifazane: uCarina Horn (AGN), uCaster (ACNW), uMapaseka (CGA), uJenna (KZNA), uWenda Nel (AGN) noSunette (ACNW).
Kuyisibusiso kwi-KZN Athletics ukuba khona kukaJenna eqenjini lesizwe.