Kugudluzwe iSasfa kumaWinter Game
Basuswe yiSafa elwela ukuzibambela kunobhutshuzwayo
IGUDLUZIWE iSouth African Schools Football Association (Sasfa) emidlalweni yeWinter Schools Game eqale ngoMsombuluko isongwa namuhla ngoLwesine ezinkundleni ezahlukene zaseThekwini.
ISasfa ibiyingxenye yale midlalo emazingeni ephansi, kodwa kuthe sekufikwa ezingeni likazwelonke itshe lagaya ngomunye umhlathi. Kuthiwa iSouth African Football Association (Safa) ithumele umuntu ongaziwa ukuzosingatha izinhlelo zikanobhutshuzwayo kule midlalo. Unobhutshuzwayo udlalelwa e-Edgewood, ePinetown.
Umthombo waleli phephandaba oyingxenye yabagqugquzeli balo mqhudelwano, uthe eminye imidlalo ihlelekile, kodwa yibhola kuphela elingaqondile kahle.
“Izinto bezihamba kahle sibambisene neSasfa. Bekukhona abantu engingabala kubona u-Eric Smith noSibongiseni Nzama esiwaziyo amagalelo abo ekuhleleni imidla- lo. Baphoqelekile ukuhoxa sekusele izinsuku ezimbalwa kuqale imidlalo. ISafa ilethe umuntu ovele wakhipha ama-fixture angaqondile. Utshele izikole ukuthi imidlalo izogijinyelwa ePrincess Magogo, KwaMashu okuyinto engekho. Kumanje kubuyelwe ohlelweni obeludwetshwe yiSasfa,” kusho lo mthombo.
UZibuse “Bizzah” Ncube ongusihlalo weSasfa KwaZulu-Natal, uthi bayaya nje emidlalweni kodwa bafike babe yizibukeli.
“Angithandi ukwanda kabanzi ngamaWinter Game ngoba umNyango WezeMfundo ukhombisa ukungahleleki. Kuyangixaka ukuthi uvuma kanjani ukuthi izingane zenganyelwe ngabantu abangebona othisha.
"Abazali balezi zingane bavume ukuthi zihambele le midlalo ngoba bazi ukuthi ziphephile ngoba zigadwe ngothisha. Angazi ukuthi uMnyango ungaphendula uthini kubazali njengoba uthathe izingane wazinikela kubantu esingabazi. Eminye imidlalo kuba nemi- hlangano yokubika nokuhlelela okuzokwenzeka ngosuku, kodwa kunobhutshuzwayo kakwenzeki lokhu. Nokho-ke ngiyacabanga ukuthi sizokube sesihleleke kangcono ngonyaka ozayo,” kusho uNcube.
UKlip Moremi ojutshwe yiSafa kule midlalo, uthi konke kuhamba kahle.
Ukuqinisekisile ukuthi iSasfa kayiyona ingxenye yale midlalo. Uthi unobhutshuzwayo kulo mqhudelwano wenganyelwe yiSafa futhi babambisene kahle nomNyango WezeMfundo. Ngesikhathi ekhuluma naleli phephandaba izolo ntambama, ube- linde umdlalo wokugcina webhola labesifazane. Uthi imidlalo iqhubeke kahle njengoba engabonanga zihibe kuyona.