MAKULIWE NEYABESABISA UMAKHOSI KHOZA
ISIMO esibhekene noDkt Makhosi Khoza oyilunga lephalamende leAfrican National Congress (ANC), kakumele sithathwe kalula ngoba lokho kuyobe kukhomba ukuthi yinkulu ingozi elengela izwe. UDkt Khoza olokhu esho njalo ukuthi kufanele kuvotwe ngokuyimfihlo uma sekuvotelwa imizamo yokuchitha uMengameli Jacob Zuma ngevoti lokungamethembi, kuvela ukuthi indodakazi yakhe isongelwa ngokuyiswa kwagoqanyawo.
Kuyabonakala nasezinkundleni zokuxhumana kukhona amalunga e-ANC akhuluma amazwi alumelayo ngaleli lunga laleli qembu kanti ngisho usotswebhu omkhulu walo, uMnu Jackson Mthembu, utshele umphakathi ukuthi uDkt Khoza uqhuba intwala ngewisa.
Siyakuqonda ukuthi ivangeli le-ANC lithi kumele ilunga elikhathazekile lilandele imigudu yeqembu, lifake khona izikhalo - lingakhulumi esidlangaleni - futhi kumele lilandele lokho osekuvunyelwane ngakho eqenjini kodwa kasiboni kuphusile ukuba umuntu onemibono eyehlukile kokushiwo yiqembu alandelwe ngezikhuni ezivuthayo.
Nakho nje ukuvumelana nabantu kodwa wena ubona ukuthi indlela engeke yone izinto yiyona yiphi, kasiboni kuphusile.
UDkt Khoza usolwa nangokuhlela izigcawu nabezindaba ngayedwana ngesikhathi kuqhubeka ingqungquthela yemigomo ye-ANC ebingeledlule kodwa yena uthi kakunjalo.
Ngabe ukwenza kweqembu elibusayo kusho ukuthi umuntu onemibono eyehlukile kweyabanye kumele athule aze afe?
Phela lokho kuyobe kusho ukuthi intando yeningi iyashendezwa kuleli qembu ebeliyilwela kusukela ngezikhathi lisungulwa. Ukwesatshiswa kukaDkt Khoza nengane yakhe kukhomba ukuthi kunabantu abazama ukumthulisa. I-ANC yiyona ehlale ishumayela eyokuvikelwa kwabesifazane nezingane - sekusatshiswa umfazi nendodakazi yakhe pho! Phela uDkt Khoza nengane yakhe bebengeke basatshiswe ngamaqembu aphikisayo ngoba akadle lutho lwawo.
Uma ngabe kuwukuthi umengameli akanankinga - nalabo abamesekayo - kungani kuvinjwa ngemigoqo ukuba kuvotwe ngokuyimfihlo? Kungani abantu be-ANC abafisa kube njalo bekhalinywa ngezinsongo? Yize amalunga amaningi asemazingeni aphansi aleli qembu ekholwa wukuthi uDkt Khoza udinga uhlanya oluzomhogelisa usinga lwesalukazi - ngoba ekholwa wukuthi kukhona okungahambi kahle ekhanda lakhe - kumele abantu besifazane baleli qembu nabamanye nje, babukele kuyena ukuthi uyayimela into okholelwa kuyona. Nabo abesilisa, kumele bazinuke amakhwapha ukuthi sekungaze kume umuntu wesifazane bona belokhu behobile ngoba kuyaziwa ukuthi bakhona abafisa ukuba kuvotwe ngokuyimfihlo odabeni lokushaya umengameli ngevoti lokungamethembi.
Yena belu uMnu Mthembu, zolo lokhu ubengomunye wabantu abebethi umengameli makehle esikhundleni, namuhla uma sekukhona abakuyona i-ANC abathi makube njalo, usebabona njengabaqhuba intwala ngewisa? Uma ngempela abe seka umengameli ukuba aqhubeke esikhundleni s okuhola izwe b engesabi lutho, m abayeke abantu abanje ngo Dk t Khoza bakhulume okusezinhliziyweni zabo ngo balo k h okukhulisa intando yeningi.
Abantu abanjengoMnu Fikile Mbalula othe amalunga e-ANC azokweseka eyokuba kuvotwe ngokuyimfihlo odabeni lukamengameli bafana nabashokobezi abaziqhumisa ngamabhomu, benza sibone ukuthi kukhona okuvinjwayo futhi bafaka ozakwabo amanzi emadolweni.
Phela ukuvota ngokuyimfihlo kusemthethweni eNingizimu Afrika futhi nenkantolo ishilo ukuthi kusezandleni zikaSomlomo wePhalamende, uNkk Baleka Mbete ukuthi akuvume lokho ephalamende, mabayekwe abantu bazwakalise ilaka labo ngevoti, kungenjalo i-ANC eyaziwa ngokulwela ubunye eNingizimu Afrika, iyoqhekezeka unomphelo - okuyokwenza inikele ngombuso wayo ngethileyi emaqenjini aphikisayo njengoba kusho umakadebona wayo, uMnu Ben Turok.
UDkt Khoza usolwa nangokuhlala izigcawu nabezindaba ngayedwana ngesikhathi kuqhubeka ingqungquthela yemigomo yeANC ebingeledlule kodwa yena uthi kakunjalo...