Ubulewe waklajwa behlaselwa
Kusolwa umbango womhlaba
SIMUNCU isimo eSiqwaqweni, eShowe, enyakathompumalanga yeKwaZuluNatal emuva kokuba kudutshulwe kwabulawa umnumzane wekhaya wakwaDlamuka nomzukulu wakhe, kwashiswa isigodlo sikamama wakhona oyisangoma ngoMgqibelo ekuseni. Kusolwa umbango wendawo ngalesi sigameko.
Kuthiwa abasolwa abathathu baqale babulala Phiwayinkosi Dlamuka (17) badlulela kuyisemkhulu, uMnu Magazukana Dlamuka (58) abangagcinanga nje ngokumbulala, baqede lapho bamgenca ngocelemba umzimba wonke, bamshiya eyizicucu.
ILANGA lithole ukuthi kwenzeka lokhu nje, umndeni wakwaDlamuka uke wasongelwa ngokuthi uzobulawa qede unqunyiswe okwezinkukhu uma ungafuni ukusuka endaweni owakhe kuyona njengoba inombango.
Kuthiwa lo mndeni usolwa ngomakhelwane ngokuthi wakhe endaweni okungesiyona eyawo yize sekunesikhathi eside wakhile kuyona. Umthombo weLANGA uthi abasolwa bafike phakathi kwamabili sekulelwe, baqala endlini ebilele uPhiwayinkosi qede banyukela endlini ebilele uMnu Dlamuka nomkakhe.
Umthombo uthi umama wekhaya usinde ngenhlanhla njengoba abasolwa bebesho ukumqeda naye kodwa wakwazi ukuphunyuka abaleke. Kuthiwa kwenzeka lokho nje, amanye amalunga omndeni abekhona egcekeni ekhaya elele kwezinye izindlu, avuswe wumsindo wokuqhuma kwesibhamu.
"Sisola umbango wendawo esihleli kuyona ngoba sekunesikhathi omakhelwane baqala ukusibangisa, besitshela ukuthi sabekwa endaweni yabantu,” kuchaza ilunga lomndeni elisidonse ngendlebe ukuba singalidaluli igama lalo ukulivikela.
Lithi lo mndeni sekunesikhathi uhlala kule ndawo, wayithenga wabekwa ngokusemthethweni kuyona.
Okhulumela amaphoyisa KwaZulu-Natal, uCol Thembeka Mbhele, uthe kuvulwe amacala amabili okubulala nawokucekela phansi impahla.
Uthi amaphoyisa abengakabophi muntu kulesi sigameko, aphansi phezulu nophenyo.