UMUNYU INDODANA ITHWESWA IZIQU
UKHIHLE isililo owesifazane waKwaNdebele, eMpumalanga indodana yakhe ayifundise ngemali ayisebenze emakhishini igqoka ijazi lokuba ngudokotela - ifundele ubudokotela eCuba ngohlelo lweNelson Mandela Fidel Castro Medical Training Programme.
UNkk Anna Zwane, ongunina kaDkt Elson Zwane (26), uthe namanje akakholwa ngukuthi yindodana yakhe ngempela lena esingudokotela ngokusemthethweni.
Uthi ushiywe ngumyeni wakhe indodana yakhe inonyaka izelwe waphoqeleka ukuvuka azithintithe ayofuna amatoho ukuze ingane yakhe ifunde. UDkt Zwane ungomunye wodokotela abangama-70 abafunde eCuba, abebethweswa iziqu, e-University of KwaZuluNatal (UKZN) ngoLwesihlanu.
"Kangazi ukuthi ngithini, ngisethukile. Bengingazi ukuthi nomfelokazi ongebani osebenza emakhishini angazala udokotela. Bekubuhlungu esafunda engabuyi umntanami - abuye kanye ngonyaka - benginovalo lokuthi angase ahluleke. Ngibonga uNkulunkulu ngoba ekugcineni useze wabuya,” kusho uNkk Zwane.
Ekhuluma neLANGA uDkt Msizi Sithole - ongomunye wodokotela abafunde eCuba - uthe babonga uhulumeni ngokubanika leli thuba eliyingqayizivele. Uthi konke abakufunde eCuba bazokwenza isiqiniseko sokuthi bakudlulisela ekhaya.
“ECuba sifunde ukuthi ukuba ngudokotela kuwubizo, kawubufundeli ngoba ufuna imali. Odokotela bakuleliya lizwe basifundise ukuba ngabangani babantu. Kuleliya lizwe odokotela babizwa ngamagama, bayaphilisana nomphakathi.
"Uma uye kudokotela uphethwe yikha-nda, akavele nje akunike amaphilisi ekhanda kodwa uhlala phansi nawe azame ukuthola inkinga onayo ebingenza uphathwe yikhanda.
"Kabagcini ngokuzelapha iziguli kodwa bazi nasemakhaya azo bayohlola isimo uma kukhona ukugula okulokhu kuhlasela kuphindelela,” kusho uDkt Sithole. ISekela-ngqongqoshe lezeMpilo, uDkt Joe Phaahla, lithe babalelwa ezi-2885 abafundi abaseCuba abafundela izifundo zobudokotela ezahlukene. Bangama-590 abaphothule uqeqesho lwabo ngaphansi kweNelson Mandela Fidel Castro Medical Training Programme, okuwuhlelo lokuthatha odokotela bakuleli bayoqeqeshwa eCuba. Kumanje bangama-98 abafundi abenza unyaka wabo wokugcina abazophuthula ekupheleni konyaka njengoba namhlanje sithwesa iminyezane abangama-70.
"Sibonga siyanconcoza kuhulumeni waseCuba ngokusivumela siyoqeqesha abantwana bethu ezweni lawo, ngokunjalo nani bafundi siyanibonga ngokuba yisibonelo esihle eCuba. Ngisho kanjena nje, yingoba ngiyazi ukuthi ukuba nifike nangaziphatha kahle bebezothi ngonyaka ozayo singabe sisabathumela abafundi,” kusho uDkt Phaahla.
Isekela lomphathi we-University of Villa, eCuba, uDkt Gutierrez Lopez, lithe laba bafundi bathweswe iziqu ngesikhathi leli lizwe ligubha iminyaka eli-100 yowayengumengameli we-African National Congress (ANC) futhi engumholi okholelwa emfundweni, uMnu Oliver Tambo.
“UTambo wayekholelwa emfundweni, wayenomqondo wokuthi abantu baseNingizimu Afrika kumele banikwe amathuba okuzithuthukisa. Siyajabula ukuthi kulobu buhlobo bethu neNingizimu Afrika sisamile kulokhu uMnu Tambo ayekholelwa kukhona,” kusho uDkt Lopez.