Uya kude umdlalo weshashalazi womasikandi
BAZIMISELE ngokuwuthatha bawuse phesheya kwezilwandle umdlalo weshashalazi ochaza kabanzi ngomsuka womculo kamasikandi obizwa nge-Voice of Masikandi.
Lona ngumdlalo obulingiswa ngoMgqibelo ebusuku e-Olive Convention Centre eThekwini obekuhloswe ngawo ukuveza nebanga eselihanjwe yilo mculo kamasikandi nendima oyidlalile ekwakheni isizwe esiphilayo. Bekuchazwa kabanzi ngisho ngabaculi asebedlulile emhlabeni nezingoma zabo ukuthi zibambe elingakanani iqhaza emphakathini esikhathini esiphambili nemiyalezo ebidluliswa ngomculo wesintu.
Kulo mdlalo bekuhlanganiswe amagidangoma kwakhiwa iqembu elilodwa okungamagidangoma asebenza ngaphansi kukaBoneni Magubane, Sanda Magubane, Amabhantinti, uMthakathi, Abafana bakaDladla, Amageza Amahle, oSaziwayo no-Mkhonyovu kanti abaculi bona okungabaholi bamaqembu bebe-ngena befaka amaphimbo abo -kuphela besebenzisa lesi sixaxa samagidangoma esisodwa.
Umsunguli walo mdlalo, uMnu Vala Mthembu, uthi inhloso enkulu wukuba abaculi bathole okokuziphilisa ikakhulukazi laba abagidayo ngoba basebenza kanzima bese bethola amakinati.
Uthi intsha eningi ayinawo umlando ngomculo kamasikandi yingakho befuna ukusebenzisa lo mdlalo weshashalazi ukuze kuhlomule iNingizimu Afrika.
Uthi kulandwe intsha edabuka ezindaweni zasemakhaya bayinikeza ithuba lokugida ukuze izobona nayo ukuthi ngesiphiwo sayo ingaya kude kakhulu.
“Sifuna ukuxoxa ngalo mdlalo ukuthi sisukaphi sesibhekephi ngomasikandi.
"Ngokwezifiso zethu wukuba lomdlalo uhambele zonke izifundazwe zakuleli ngisho phesheya kwezilwandle imbala bese nohulumeni asondele eduzane kwethu aweseke ngoba siqhakambisa imvelaphi yethu.
"Sizimisele ngokwakha isizwe ukuze okwethu kungashabalali,” kusho uMnu Mthembu. Uthi bazosebenzisana nalaba baculi kuze kube lomdlalo uyahlonishwa umhlaba wonke ngoba basazoya kude.
Lo mdlalo uhlanganiswe yinkampani yomculo iBhoklolo ngokubambisana nabalingisi bomdlalo kamabonakude Isibaya, okunguNhlanhla Mdlalose olingisa indawo kaBongani noMuzi Mthabela olingisa indawo kaDuma okunguyena obexoxa ngomlando ngaphambi kokuba kungene umculi esiteji futhi okunguye obhale iscript salo mdlalo.
Bekunandisa naMabhenanyawo (uPhuzekhemisi, Bahubhe, Thwasa Lekhansela, uNyonemhlophe, uMbuzeni neChwane Lebhaca).