Iphendulwe ihlaya eyamacala kaDkt Khoza
Bathi sebekwenzile bona obekufanele
IPHENDULWE ihlaya izolo ngoLwesithathu ezinkundleni zokuxhumana i-African National Congress (ANC) KwaZulu-Natal emuva kokuba kuvele ezithi isimbeke amacala ngokusemthethweni uDkt Makhosi Khoza oyilunga lephalamende osolwa ngokudicilela phansi isithunzi saleli qembu.
UDkt Khoza usolwe ngokukhuluma esidlangaleni ethi kumele uMengameli Jacob Zuma ehle esikhundleni futhi kuzomele uma eseshaywa ngevoti lokungamethembi ephalamende mhla zisiyi-8 kwezokwethwasa, kuvotwe ngokuyimfihlo.
KwiTwitter nakwiFacebook kube nemibono eyahlukene njengoba kukhona abakhale ngokuthi i-ANC ikhetha iphela emasini uma ishushisa amalunga, kungani ithulile ngesikhathi uMnu Jackson Mthembu, uMnu Mcebisi Jonas noMnu Pravin Gordhan besho okufanayo ngoMengameli Zuma.
ICongress of South African Trade Unions (Cosatu), edlela lugqokweni lunye ne-ANC, ithe kufanele ngabe lokhu leli qembu elikwenza kuDkt Khoza ikwenza kuMnu Zuma.
Kukhona abafake ipheshana elihlekisa nge-ANC, elikhombisa "amacala" abekwe uDkt Khoza.
Phakathi kwawo kubhalwe elokungalaleli, wukukhuluma iqiniso elome geqe, yiqiniso eledlulele, wukwethembeka okwedlulele, yiqiniso eliningi kuneli- fanele, wukuba nezinwele ezifana nezomculi uDianna Ross njalo njalo.
UDkt Khoza kulindeleke ukuba avele phambi kwekomiti lokuqondiswa izigwegwe zingakapheli izinsuku ezili-14.
Okhulumela i-ANC KwaZuluNatal, uMnu Mdumiseni Ntuli, ukuqinisekisile ukuthi uDkt Khoza uthweswe amacala ngokusemthethweni.
“Thina obekumele sikwenze sesikwenzile samthwesa amacala, sekusele ekomitini eliqondisa izigwegwe ukuba liqhube uhlelo ngokulandela imigudu efanele. Simlindele ukuba avele phambi kwekomiti ukuze kube nezinyathelo athathelwa zona ngokufaka iqembu ehlazweni,” kusho uMnu Ntuli.
Imizamo yokuthola uDkt Khoza ishabalale okwamazolo ebona ilanga njengoba ucingo lwakhe belukhala lungabanjwa kanti nomyalezo athunyelelwe wona kuze kwashaya isikhathi sokuloba engakawuphenduli.