KUZOPHENYISISWA NGEKAMANDELA
AMALUNGA omndeni kaMnu Nelson Mandela (ongasekho), asenxuse ababhekelele ezamafa alo mholi ukuba baphenyisise ngokushicilelwa kwencwadi esihloko sithi Mandela’s Last Years, ebhalwe ngudokotela wakhe, uDkt Vejay Ramlakan.
Lo mndeni uthi ufuna ukwazi ukuthi yiliphi leli lunga lawo okuthiwa yilona eligunyaze ukuba ishicilelwe le ncwadi ebhalwe nguDkt Ramlakan ngesikhathi esasebenzela umbutho wezokuvikela waseNingizimu Afrika.
Le ncwadi ihoxiswe ngoMsombuluko ukuba ithengiswe ezindaweni ezahlukene ngemuva kokuba umfelokazi kaMnu Mandela, uNkk Graca Machel, esabise ngokuthatha izinyathelo zomthetho. Umzukulu kaMnu Mandela, iNkosi Mandla Mandela, usishayele ihlombe isinqumo senkampani eshicilele le ncwadi, iPenguin Random House, sokuyihoxisa emashalofini ezitolo.
“Odokotela bayafunga ngokusemthethweni ngokugcina ulwazi oluthinta iziguli zabo ziyimfihlo. Ngakho sinxusa ukuba labo ababhekele amafa kaMadiba okubalwa kubona uGeorge Bizos, iJaji (Dikgang) Moseneke neJaji (Themba) Sangoni balufakele izibuko lolu daba,” kusho iNkosi Mandela. Umndeni kaMnu Mandela ukhala ngokuthi le ncwadi inezinto eziningi eziphambene futhi ezingacacile kahle.
IJaji Moseneke lizwakalise ukuthi bazimisele ngokudlulisa ukukhononda kwabo embuthweni wezokuvikela kuleli nakwiHealth Profession Council. UMnu Nelson Mandela udlule emhlabeni zili-13 kuZibandlela (December) wezi-2013 emuva kokugula isikhathi eside.
Umndeni ufuna ukwazi ukuthi...