Owezemfundo awuyingeni eyokuxosha uthishanhloko
Abazali bafuna owolunye uhlanga
USHAYA phansi ngonyawo uMnyango wezeMfundo eGauteng, uthi lingawa licoshwe yizinkukhu, ngeke umkhiphe esikhundleni uthishanhloko otelekelwa ngabazali abangamakhaladi ngoba bethi umpisholo.
Abazali bezingane ezifunda eKlipspruit Secondary School eSoweto, eGoli, bavuke umbhejazane ngoMsombuluko bavala isikole bathi kabamfuni uthishanhloko omnyama esikoleni sabo samakhaladi.
Okhulumela uMnyango wezeMfundo eGauteng, uMnu Steve Mabona, utshele ILANGA ukuthi lokhu okwenzekayo kuphambene kakhulu nomthetho.
Uthi uthishanhloko uqashwe ngokwesipiliyoni sakhe nangokweziqu - ngaphandle kokuba kubhekwe ubuzwe bakhe.
“Ungqongqoshe uzohlangana nabo abazali namhlanje ebusuku (ngoLwesithathu) ukuze ethole kabanzi ukuthi kungani ngempela benza into efana nalena. Uma kuwukuthi balwela ibala lakhe lodwa, kasiboni impela ukuthi sizovumelana nabo,” kusho uMnu Mabona.
Uthi okudida kakhulu wukuthi uthishanhloko uqale ukusebenza kulesi sikole ngoMasingana (January) nonyaka kodwa sekuthi ngesigaba sesithathu sonyaka sebethi kabasamfuni emagcekeni esikole.
Uthi bazovumelana nabazali uma bezobeka ezinye izizathu hhayi ezokucwasa ngokwebala. “Ngesikhathi kuqashwa uthisha- nhloko, abekhona amalunga esi- gungu esilawula isikole okubandakanya nabazali bazo lezi zingane, kwaba yibona abathatha isinqumo sokuba aqashwe. Uma kuwukuthi mhlawumbe amalunga esigungu esilawula isikole abengahambisanga ngohlelo lwakhona, singavumelana nokuthi kuhlakazwe isigungu sabazali hhayi ukuba kuxoshwe uthishanhloko,” kusho uMnu Mabona.
Kuthiwa abazali bathi bebengekho ngesikhathi kuqashwa uthishanhloko futhi kabaziswanga lutho ngokuqokwa kwakhe, okuyikhona okwenza balwele ukuthi ngeke izingane zabo ziphathwe nguyena.
ILANGA lithole ukuthi abazali bathi ngeke kuqhubeke ukufunda uma kuwukuthi uNgqongqoshe wezeMfundo eGauteng, uMnu Panyaza Lesufi, akasishintshi isinqumo sakhe sokuqasha lo thishanhloko.
Kuvela nokuthi uMnu Lesufi uthe ngeke alubhade kulesi sikole uma kuwukuthi abazali kabasivuli njengoba begcine ngokusivula ngoLwesibili bathi bafuna yena azifikele mathupha ngoba kabahambisani nomuntu omnyama.
“Kakwaziwa ukuthi abazali sebecasulwe yini kulesi sikole kodwa bamile kwelokuthi kumnyama kubomvu ngeke asebenze uthishanhloko esikoleni sezingane zabo,” kusho umthombo okhulume naleli phephandaba.
UMengameli weNational Teachers' Union (Natu), uMnu Siphosethu Ngcobo, uthi kakukwazi ukwenzeka ukuba abazali basho into efana nalena.
“Akekho umuntu ongakazi ukuthi eNingizimu Afrika ukucwasa ngokobuhlanga kakuvumelekile. Uthishanhloko kumele ahlale lapho, akekho ongazi ukuthi sisuka esikhathini esinzima kanjani lapho besicindezelekile khona,” kusho uMnu Ngcobo.
UNobhala weSouth African Democratic Teachers' Union (Sadtu) eGauteng, uMnu Tshidiso Ledimo, uthi kubaphethe kabi okwenziwa ngabazali.
Utshele ILANGA ukuthi kabahambisani nakho futhi ngeke kwenzeke intando yabo.
“Kasihambisani nabantu abasabuyisa ukucwasa ezweni. Kasikwazi ukuvumela into efana nalena, sizohlangana nabo abazali sibatshele nje iqiniso,” kusho uMnu Ledimo.