UKHATHAZEKILE UGOGO OWAKHELWA INDLU ENGAPHELI
SISENKINGENI isalukazi esihlala kwamakhelwane waso ngenxa yokungapheli kwendlu yomxhaso kahulumeni esiyithole nyakenye.
UNkz Nonsindiso Motaung (73) waseDebeni, eNquthu, enyakatho yeKwaZulu-Natal, ukhala ngokushaya ngolonwabu kokuqedwa kwendlu yakhe njengoba ethi naye usezibona ewuhlupho kumakhelwane wakhe osekunesikhathi eside emcuphisile.
Uthi usekhathele wukwehla enyuka emahhovisi okuyiwona abhekelele uhlelo lokukhishwa kwezindlu zomxhaso nakumasipala waseNquthu imbala. Utshele ILANGA ukuthi zonke izindlu ezakhiwe kanye neyakhe seziqediwe ukulungiswa.
“Sesiside isikhathi ngilindile kodwa okudidayo wukuthi kungani eyami ingapheli ngoba ezabanye seziqediwe. Kakusekho okuningi okumele kwenziwe ngaphandle kokufakelwa uthayela phezulu nezicabha bese ngingena phakathi,” kusho uNkz Motaung.
Uthi ngokwezinhlelo bekumele iqedwe ngoNhlangulana (June) nyakenye. Uveze ukuthi lolu daba ulubikile ekhanseleni elisha lakuwadi 11, uMnu Mabilabila Kunene - oyimeya yaseNquthu - kodwa ubona kuthule du.
“Isimo engibhekene naso sibuhlungu. Uma kumele ngiyobika lolu daba kudingeka ukuba ngiqashe imoto kwazise kakusahambeki ngenxa yokugula. Kangisakwazi okumele ngikwenze ekubeni nami ngivotile njengabo bonke abantu. Okudidayo wukuthi kabangitsheli ukuthi kungani indlu yami ingaqedelwa. Ngikhathazekile kakhulu, kwalona ikhansela kawukho umnyakazo eliwenzayo,” kusho uNkz Motaung.
UNkk Sizani Mtshali ocuphise uNkz Motaung, uthi naye ubenza ububele kodwa seside lesi sikhathi.
“Ugogo useyinto ehlala phansi njengoba ekhukhunyalelwa yisisu, akakwazi ukuzenzela izinto. Uyadinga ukuhlala kahle endlini yakhe athokoze njengazo zonke izakhamizi zendawo,” kusho uNkk Mtshali.
Usonkontileka obebhekene nokwakha izindlu kule ndawo, uMnu Sipho Ngobese, uthintwe yiLANGA wathi uzokwenza konke okusemandleni ukuthi liphele isonto elizayo sekuqedwe konke ngale ndlu.
“Kunezindlu esingakwazanga ukuziqeda ngoba abanikazi bazo bebengawasayinile amaphepha kanti nesikhalazo sikagogo ngiyasazi impela,” kusho uMnu Ngobese. UMnu Kunene uthe lesi simo sizolungiswa ngokukhulu ukushesha ngoba izimfuno zabantu yizona abazibeka phambili.