Uvalo emaphoyiseni aseMzimkhulu
Aseke angenelwa yizigebengu esiteshini
ADLIWA yingebhe amaphoyisa asesiteshini sase-Ibisi, eMzimkhulu, eningizimu yeKwaZulu-Natal njengoba ethi sekuphele iminyaka esebenza ngamaveni angenabo o-ova.
La maphoyisa athi uma ebizwe ukuyosebenza ebusuku, asebenza enetwetwe esaba ukuthi izigebengu asuke eyozifuna zingawahlasela aze afe engatholi ngisho usizo eziteshini eziseduze njengoba engakwazi ukuxhumana nesiteshi uma esebenzela ngaphandle.
Ngokusho kwelinye iphoyisa elisebenza kulesi siteshi - elicele ukuba igama lalo ligodlwe ukwenzela ukuphepha - amaphoyisa amaningi kawasafuni ukuyosebenza ngaphandle ngenxa yale nkinga.
"Kayikho into elungile kulesi siteshi njengoba neziboshwa zimpintshwa esitokisini esisodwa ngoba zonke ezinye kazikho esimeni futhi kade kwakubikwa zingalungiswa. Ugesi egcekeni kawukho, kumnyama bhuqe kusukela ngowezi-2013.
"Iziboshwa zingeqa singaziboni ngisho ukuzibona. Kulesi siteshi kuke kwangena izigebengu zizofuna izibhamu kozakwethu ababesebenza ebusuku ngenhlanhla bakwazi ukuzivikela kwangalimala muntu. Lesi sigameko senzeke ngowezi-2015 kodwa namanje udonga lusezimbobombobo yizinhla- mvu kalulungiswa,” kusho leli phoyisa.
Umphathi walesi siteshi, uLt Colonel Bheki Mbanjwa, ebuzwa ngalolu daba uthe akafuni ukuyikhuluma le isingaphezu kwakhe. Ucele ukuba kuthintwe u-cluster commander ngoba zonke izinkinga ababhekene nazo uyazazi, kazizintsha. Uthe kodwa olwamalambu akhanyisa ngaphandle seluyalungiswa, kungekudala kuzobe sekukhaya esiteshini.
U-cluster commander, uBrigadier Thobekile Shazi, uthe ngamanga aluhlaza ukuthi kabekho o-ova futhi kakukhanyi esiteshini. Uthi bebengeke bathule bengayibiki inkinga enkulu kanjalo.
“Uyabona nje, ngoLwesihlanu besihlangene esiteshini sase-Ibisi kukhona nongqongqoshe ababili okungowezokuphepha, uMnu Mxolisi Kaunda nowezokubusa nokubambisana, uNkk Nomusa Dube-Ncube, siyokhuluma ngalolu daba lwala makhansela adutshuliwe. Akekho oke wangibikela inkinga enjalo. Umasiteshi walesi siteshi naye ubekhona emhlanganweni ubengeke angayisho leyo nto,” kusho uBrigadier Shazi.