AKUDLULE ISIMO KUSALE UMUNTU
KUNEZIMO empilweni okumele zikufice njengomuntu bese ziyadlula, kodwa qaphela-ke ukuthi ungadluli nezimo. Endulo kwafika uzamcolo wadlula nempilo yabantu abaningi kodwa abasinda ngabacasha emkhunjini kaNowa.
Kunezimo ezidlula nabantu kodwa abanye bame kudlule lezo zimo.
Ugade izinqumo ozithatha ngenxa yentukuthelo, zingadala ukuba uhambe umuke nozamcolo. Kasikaze sizwe ukuthi uzamcolo wababuyisa owabathatha kodwa sizwa kancane ukuthi bakhona abasinda kuwona.
Ngoba kasikho isimo esingadluli, ugade-ke empilweni ungathukutheli kakhulu kuze kube sengathi isimo obhekene naso ngeke sidlule.
Uthi bewazi nje ukuthi njengamanje njengoba sikhuluma nje, kunomuntu ogwetshwe udilikajele ngenxa yesinqumo asithatha?
Kunabantu ababoshwa bagwetshwa emajele ngenxa yokuthi babambe izithandwa zabo oqotsheni namashende noma nabanye aba- ntu nje engicabanga ukuthi ukuba kuthiwa base beyifundile le ngosi ngabe kabekho emajele kodwa bahleli nemindeni yabo. Okubuhlungu kakhulu kunabantu abaningi asebebhadle emajele ngenxa nje yezinqumo abazithathe ngenxa yezimo ezibehlele empilweni. Impilo kayithathwa ngelukuluku. Umuntu ohluthukelwa yinhliziyo kulula ukuba alahlekelwe ngisho ngokokugcina abesele nakho.
Ngiyaphinda ngithi kasikho isimo esingadluli empilweni, kalikho ihlazo elingadluli empilweni, yonke inkinga obhekene nayo inosuku eyophela ngalo. Uma ubona sengathi into obhekene nayo kayidluli kusuke kuyindlela oyithathe ngayo.
Yikho izingcithabuchopho zithi: “Inkinga kakusiyona inkinga kodwa yindlela obuka ngayo inkinga eba yinkinga”.
Noma kungabe yini ekwehlele empilweni, isengadlula kodwa isinqumo osithathile singenza ukuba into obhekene nayo idlule noma ingadluli. Kuzona zonke izimo esibhekene nazo empilweni, kasikho esingeke sidlule. Ngiyaphinda ngithi kasikho isimo esingadluli kodwa qaphela singadluli nawe.
Makudlule isimo kusale umuntu, makuwe igatsha kundize inyoni, makufike uzamcolo kusinde uNowa. Kungathi uma wehlelwa yisimo empilweni bese uziqedela. Ngiyakuqinisekisa ukuthi lesi simo okusona njengamanje uma nje ungazinika isikhashana, sizodlula.
Ungazibulali ngenxa yesimo esidlulayo, ungasithathi isinqumo esiyokubukanisa nabantu ugcine usubhadle ejele impilo yakho yonke. Kunezinqumo ezidabukisayo ezathathwa ngabantu phansi komthunzi welanga. Esokuqala inkosikazi eyase ihlushwa yindoda yayo iminyaka yagcina ithathe amafutha abilayo yabhunyela ngawo indoda ebiyihlupha.
Yaboshwa yagwethswa le nkosikazi, isigebengu sasala ngaphandle. Okwesibili ngumuntu owathola ukuthi uphila nesifo esithile wanquma ukuzibulala engazi ukuthi kuzofika lesi sikhathi esiphila kusona la sekunekhambi namaphi- lisi okuba ukwazi ukuphila nesifo esadala ukuba azibulale. Okwesithathu umuntu wesifazane obezalwa emndenini ompofu, ngenxa yendlala ayebhekene nayo ekhaya, wanquma ukudayisa ngomzimba kwabonakala sengathi kuyamsebenzela ngoba wakwazi ukondla kubo.
Kwathi ngelinye ilanga wathola ucingo lukaninalume ethi usemtholele umsebenzi owawuzomholela u-20 000-00 ngenyanga bese bemnika nemoto yomsebenzi ayezohamba ngayo. Isikhundla ayenikwe sona kwakungesokuphatha izisebenzi. Wajabula ngendlela engachazeki kodwa kwaphela izinsukwana ezimbalwa ephoxekile ebheke phansi njalo uma ebuya emsebenzini ngoba ezinye zezisebenzi ayekade eziphethe emsebenzini kwakungamadoda ayekade emthenga esadayisa ngomzima. Isinqumo lo sisi asithatha elambile, samhlukumeza mhlazane uNkulunkulu esemhambele.
Mangivale ngokuba sikhumbuzane ukuthi kawubulawa yisimo esifika kuwena nesikwehlele, kodwa ungabulawa yisinqumo esingaphusile osithathayo ngesimo esikwehlele.
* Uma ufuna ukuthola uMfu Zondo bukhoma, vakashela ibandla lakhe ngeSonto ngehora le-10. Siku-110 Williams Road uma usuzofika eDalbridge Train Station.
* Kubo bonke abafundi bephephandaba lethu siyafisa ukuba sisizane futhi ngiyafisa ukuniphendula nonke ngebhadi ucingo noma inombolo iyodwa ngakho akululanga ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
*UPastor Sthembiso Zondo ngumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA LangeSonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kuFacebook: Sthembiso Zondo Fan Page noma kuWhatsApp: 082 070 8034