AVE ZILAHLEKA IZINTO NGOMNGCWABO
UBONA abafelokazi bale mihla sebesukuma phansi nje bahudule amatshali bazibambele mathupha ezinhlelweni zemingcwabo yabantu babo, yingoba ave bubuningi ubuqola obenzeka uma kushoniwe. Sengiye ngizwe bebhilita abafelokazi bethi wonakalelwa yizinto uma uvumela ukugqunywa ngengubo emakha-ndleleni, kumele wesule izinyembezi uvule amehlo ube kleleklele.
Phela kudala umfelokazi wayemboza kusukela ekhanda, engabuvezi nhlobo ubuso. Kangikhathali ngisho kungathiwa ngabomndeni, yizihlobo, ngomakhelwane ngisho namakholwa imbala, iqiniso wukuthi phakathi kwabantu abasuke beye la kushonwe khona kukhona abayele ukuyozavuna ukudla bakushushumbise sekuyizishuqulu bakuyise emizini yabo noma bakuthwale ngezimoto. Abanye bazothatha amatoaster namaketela - ngisho namaphinifa kamama wakhona kawaphephile. Nizosala niqothukile uma ningabeki kahle impahla nibe nibona ukuthi izandla ziningi.
Afike umama-mkhokheli enikhonza naye noma umakhelwane aze akumbambathe ekududuza phela: “Awu qinisela ntombazane, siyazi kubuhlungu ushiywe nguyise wabantwana kepha nathi sizokukhulekisa.” Uma eqeda lapho nanguya tshobe emakameleni nasekhishini, usaqalaza nje ukuthi “zikhiphani.” Omakhelwane-ke bona ngoba bafika kuqala usadideke ngempela, usanda kuzwa ukuthi sewushonelwe, kabagangi kanje! Uma unomndeni owakhe kude, ufika omakhelwane sebechachaza ngoba yibona abaseduze. Kuhle ukuba basheshe basabele uma sekuvele umonakalo.
Engifisa sixoxe ngabo yilaba abathatha ngozwani. Phela kweminye imizi labo makhelwane basuke beze ngamaqhinga baze bagamanxe ngisho usufikile umndeni. Useqhoshe ngokuthi phela nguyena ofike kuqala wafudumezela utshwala, wenza namahewu futhi nguyena owazi kahle umndeni oshonelwe ngoba uhlala ephuza itiye nomama walapha ekhaya. Wumndeni ngapha ufuna ukushaya amaphiko. Sake saba neshwa ekhaya kushone ubaba sisakhe kwelinye izwe, wangena nangesiphanga umakhelwane etshela thina zingane zikamufi ukuthi kumele kufihlwe ngaluphi usuku, habe! Uyazi uzwe kujuluka amakhwapha.
Yayixoxwa ngezingcingo-ke indaba, thina zingane zakhona sisemadolobheni sithi sixoxa nomam’ omdala ukuthi ngoba isonto limi kabi kungcono sihlelele ukufihla ngempelasonto. Umam’ omdala - ngenxa yesibibithwane nangenxa yokumethemba lo mama ongumakhelwane wakhe - amnike ucingo. Ngokunikwa ucingo nje lo mama azibone eseyingqongqo eshaya amaphiko kwethu, ngobaba wethu futhi. Ngeke ngisachaza ukuthi kwenzekani emuva kwalokho ngoba samcela nje ukuba ake athi ukuma eceleni abuyisele ucingo kumama wethu omdala okunguyena esingabonisana naye kahle.
Siyafika nje ngakusasa useyagqishazela umama-makhelwane, usesho ukuthi: “Cha, phela singathini ngoba sekufike izintombi zakhona.” Sidlule-ke kwezakithi, ha-haa-haaa. Iyenyuka-ke imimoya kokunye. Abomndeni baze balikhiphe ngembaba elokuthi umakhelwane ake athi xinti kancane ngoba nakhu sebefikile bazohlahla indlela izinto okumele zenzeke ngayo. Noma ngabe umndeni useduze-ke, kuyafana ngoba zombili lezi zinhlaka - umndeni nomakhelwane - kukhona kubona abasuke bephuthuma la kushonwe khona beyela okwabo okuthe phecelezi.
Kukangaki nje uzwa umuntu ethi wadukelwa yijazi lakhe elithile ngomngcwabo? Uzwe umame ethi akasaliboni ibhakede noma iphinifa lakhe elisha ceke, athi laduka ngomngcwabo. Ngebhadi kasize singanikwa ithuba lokulungiselela ukushonelwa ngoba ngabe ngithi masibothukusa yonke into esiyikhonzile size siyikhiphe emuva komngcwabo.
Le nto yenzeka ngesikhathi umfelokazi noma lowo oqondene netshali esazididekele eshaqekile, kukhona olokhu engena izindlu noma igumbi ngalinye nje enombola izinto “ezilahlile” ezidinga ukwebiwa. Uzothi angalithola kahle ithuba avele aqonde ngqo lapho ahoshe lokho akufunayo.
Kuvame ukuba wonke umuzi ube nomalume ongumahlalela-ke, lo obizwa ngoqhwayilahle ngoba engafuni sidalo ukusebenza hhayi ngoba engawatholi amatoho.
Uma kuke kwashonwa, hha zimbiwe yinsele kumalum’ uqhwayilahle. Nanguya enyonyoba eyokhwatha emakhukhwini kowodilophu, aphakamise omatilasi embhedeni, athintithe nemicamelo, uma kunemali ebishuthekwe lapho, ohho! Nezikhwama zosisi balaph’ ekhaya kakumele zisale nje zikhamisile ngoba uzonyomula nga-R100 umalume azithulele. Ngeke vele ubone ngoba imali ibizwa ngapha nangapha ngalezi zinsuku ngakho kawube usabala nokuthi bekunamalini.
Uma kushoniwe kugangwa uze ugangelwe nayizingane zalaph’ ekhaya, khona la kushonwe khona. Zihlangane nomzala kube wuthuxa beqhobozela kwasani ethi shintshi. Uboke unake ukuthi kuhlala kuthiwa kushodile. Kuqhanyukwa nodaba oluthi: “Sisale sesithenga nofulawa wamadombolo ngoba besibona ukuthi uzodingeka nawo ngoMgqibelo.”
Ngakolunye uhlangothi nangu umalumekazi waseGoli benomzala waseMpangeni bakuhlohla ngeheheba lohlu lwezinto zokupheka ezidinga ukuthengwa. Ukhiphe imali kube sengathi cha kuzokwenela. Ihe, bafike esitolo, usubona ngocingo nje lungena: “Sicela uphuthumise uBafana no-R2 000 lapho ngoba manje sisemshinini sithi siyakhokha akuseneli, sekuvele kwashoda.” Uboke ubheke izinto abasuke bethi bazithengele umngcwabo labo mzala nomalumekazi, uzothola amaroll on nama-purity ezingane zabo. Yiyona kanye le nto eyenza igilosa yomngcwabo ingabe isenela. Thobile.Nxumalo@ilanganews.co.za noma editor@ilanganews.co.za. Ukhona nakuFacebook: Thobile Nxumalo, kwiTwitter: @ThobileNxumalo nakwi-Instagram: nxumalo_r_nxumalo