Ingakumisela inhliziyo eyezikhundla emsebenzini
KUNOMA iyiphi inkampani asikho isikhundla okungesomuntu othile ngaphandle uma kuyinkampani yakhe noma yakubo.
Kulabo abasebenza beqhoqhobele izikhundla ezinkampanini zabanye abantu kumele kuhlale obala njengezinqe zesele ukuthi kasikho isikhundla okungesomuntu othile.
Kubalulekile ukusebenza ngaphandle kokugaqela isikhundla ngoba ungazithola usesimeni esibucayi kwesinye isikhathi ugcine usulahlekelwa ngumsebenzi.
Lokhu kungadalwa ngukuthi awusakwazi ukusebenza kahle ngenxa yokuthi isikhundla obusigaqele sinikezwe omunye umuntu bese uphazamiseka emoyeni, ungabe usakwazi nokuqhubeka wenze kahle umsebenzi wakho.
Uma kunesikhundla oyibamba kusona kakuchazi ukuthi sizonikezwa wena uma sekuqokwa ozosithatha ngokugcwele noma ngabe uyisekela lobesiqhoqhobele.
Kumele ukubeke emqondweni wakho ukuthi leso sikhundla kakukabi ngesakho kuze kube inkampani ikubeka ngokugcwele.
Uma uke wazicabangela ngokwakho ukuthi isikhundla esithile kuzoba ngesakho kuba nomthelela omubi ongaholela ekubeni uhlukumezeke emoyeni, ungabe usawuthanda umsebenzi uma kugcina kuqashwa omunye umuntu kusona.
Ungazithola usungasakwazi ukusebenza ngokukhululeka ngenxa yokuphoxeka. Kwesinye isikhathi kuyenzeka ugcine ungasamhloniphi nalowo onyuselwe kusona noma oqashiwe ukuba asiqhoqhobale.
Phela enkampanini kunabantu abacabanga ukuthi bangenza kangcono uma bengase banikwe izikhundla ezithile. Mina ngithi yenza kangcono umsebenzi wakho, ungabheki izikhundla zabanye abantu ngoba azihlangene nawe futhi awuqashelwanga ukubhekana nazo.
Okwakho is to excel ekubeni yilokhu okuqashelwe and the rest will follow. Ziyaxabanisa izikhundla ezinkampanini njengoba kwezinye kuze kuphume nezidu- mbu. Inkampani inemigudu yayo eyilandelayo uma iqoka abazoba sezikhundleni ngakho akusho ukuthi uma usale ngaphandle kunetiye noma ukwenzelela.
Hlonipha isinqumo senkampani oyisebenzelayo, uhloniphe nalabo abaqokwe yiyona ukuba bakuhole. Uma usebenza ngokuzimisela futhi uyilokhu abakufunayo kumuntu osesikhundleni isikhathi sakho sizogcina sifikile futhi uma singafikanga ungadikibali.
Abanye ongoti bavamise ukuthi kakusiye wonke umuntu odalelwe ukuba aphathe, ngeke ngisho ukuthi ngiyavumelana nabo noma cha, I will let you decide kulokho. Kunabantu abazithobile emsebenzini but will rise to the challenge uma benikwa ithuba.
Ungazithola ungasakwazi ukusebenza ngokukhululeka.