Ubhekene nomqansa uDr Tumi
KULINDELEKE kuqopheke omunye umlando kugcwala phama iTicketpro Dome, nokuwumqansa ongagitshelwa mbongolo njengoba le ndawo ilayisha abantu abangama-20 000 uma igcwele phama.
UDr Tumi ungumculi wokholo odlisayo nosewole inqwaba yezindondo okungamaCrown Gospel Awards ayisithupha, waqokwa kabili kumaSouth African Music Awards, wahlomula nangeyodwa kumaMetro FM Music Awards.
Nguye-ke lo okulindeleke agcwalise le ndawo esiyashikilisa abaningi, mhlaka-20 kwezokwethwasa uNcwaba (August).
Umculi ofake ufuqufuqu kwabaningi nguRefiloe Maele Phoolo odume ngelikaCassper Nyovest, ngokuyigcwalisa phama le ndawo, ngomhlaka-31 kuMfumfu (October) 2015.
Okunye okuthiwa kuyahlupha ngayo wukuthi kufuneka izigidi zamarandi ukuyibekisa nokuba ngenkulu inkinga uma abaxhasi bengekho.
Kule ngqayizivele uDr Tumi uzobe eqopha bukhoma iDVD. Esitatimendeni asithumelile uthi:
“UNkulunkulu ube nomusa omkhulu kimi selokhu ngaqala emculweni. Esikhathini nje esifushane ungikhombisile umusa nobukhulu bakhe.
“Ngimema bonke abamkhonzayo ukuba bafike ukuzozibonela amandla kaNkulunkulu esebenza. Kuzoba wubusuku obubusisekile bokudumisa nokumkhonza.”
Mabili kuphela ama-albhamu asawakhiphile njengoba ekhonzwe kangaka, ethi “Love & Grace” nethi “Heart of a King”.
Ngale nje kwempumelelo yakhe egqamile, usanda kusayina ne-Universal Music ukuba isabalalise umculo wakhe emazweni amaningi emhlabeni jikelele.
Amathikithi atholakala ngemali ephakathi kuka-R180-R500 ezindaweni ezijwayelekile eziwadayisayo.