INYUNYANA YOTHISHA IFUNA KUPHENYWE EYOKUDLA EZIKOLENI
IZIKHULU zomnyango wezemfundo maziphume embangweni wamathenda okuhlinzeka ngokudla ezikoleni ngoba yikhona okwenza umsebenzi ungahambi kahle.
Lokhu kushiwo nguMengameli weNational Teachers‚Union (Natu), uMnu Siphosethu Ngcobo, othi zingaphezulu kweziyisi-9 izikole athole ukuthi abafundi bazo babhuqwe yindlala KwaNgwanase, enyakatho-mpumalanga yeKwaZulu-Natal emizuzwini eli-10 kade ekule ndawo ekubeni umnyango uphika ukuthi kunezikole ezingakutholanga ukudla njengoba zivulwe ngoMsombuluko.
“Kunenkohlakalo eningi kabi kule nto futhi bukhona ubufakazi balokho. Kunezinkinga nje yingoba yizona izisebenzi zomnyango ezicashe ngemuva kuyona yonke le nto. Kuyihlazo ukuthi kungaba nezingane ezingadlile ngenxa yabantu abathile abanezinhloso zabo kuwona ngqo umnyango,” kusho uMnu Ngcobo.
Uthi kumele uNgqongqoshe wezeMfundo KwaZulu-Natal, uMnu Mthandeni Dlungwana alubuyekeze uhlelo lokukhishwa komsebenzi wokuhlinzeka ngokudla ezikoleni. Kwenzeka lokhu nje, kuzwakale izindaba zokuthi indlala idla lubi ezikoleni zaKwaZulu-Natal ngoba kunemibango yamathenda njengoba umnyango ukhiphe uhlu lwabantu abasha abanikezwe umsebenzi wokuphakela izikole.
Okhulumela umnyango, uMnu Kwazi Mthethwa, uthi kakusilona iqiniso ukuthi kunenqwaba yezikole ezingadlile. Utshele ILANGA ukuthi kunabantu abafafaza amanga ngoba bengawutholanga umsebenzi wokuphakela izikole.
“Vele sikulindele ukuthi kungaba nezinkingana ngenxa yokuthi laba abangayitholanga ithenda basabalalisa okungesilona iqiniso ngenxa yomona wokuthi bebefuna kusebenze bona bodwa.
“Kunabantu asebehlale iminyaka ngeminyaka kulolu hlelo, abangathandi uma sekunikezwa abanye ithuba bafuna kwenzeke ngendlela yabo.
“Siyakuqonda ukuba wuhlelo olukhulu lolu futhi olunemali enkulu, yingakho kuzohlale kubangwa umsindo kodwa-ke lokho kakusinqindi amandla okuthi siqhubeke nokusebenzisana nabantu okuyibona abanikezwe umsebenzi ngoba okubalulekile wukuthi abantwana kumele badle,” kusho uMnu Mthethwa.
Uthi emnyangweni kabanazo izinhloso zabo ezithile ngokukhishwa kwethenda futhi kazikho izihlobo zabo ezinikezwe umsebenzi. Uveze nokuthi bebevulele ithuba lokuba kufakwe izikhalo uma kukhona abanganelisekile ngokukhishwa kwalo msebenzi.
“Ngikhuluma nje simatasa njengamanje siphume umkhankaso sibheka ukuthi uhlelo lokudla luhamba kanjani ezikoleni ngokubambisana nesiShayamthetho saKwaZulu-Natal, okuyizinkomba zokuthi siyikhathalele impilo nemfundo yabantwana, nokuthi-ke sibone ukusebenza kwabo selokhu unyaka uqalile,” kusho uMnu Mthethwa.
Imizamo yokuthola uNobhala weSouth African Democratic Teachers‚ Union (Sadtu), uNkz Nomarashiya Caluza kayiphumelelanga.
Siyakuqonda ukuthi uhlelo olukhulu lolu futhi lunemali enkulu, yingakho kuzohlale...