BAKHATHAZEKILE NGENQUBO YESIKOLE
BAKHATHAZEKILE ngokuxoshwa kwezingane zabo abazali babafundi baseHawa Primary School KwaWosiyane, eNdwedwe, enyakatho yeTheku - abayisola ngokuthi kayinamthetho. Lokhu kuthiwa sekwenze abafundi abaningi bafudukela kwezinye izikole.
Laba bazali sebezwakalise ukungaphatheki kahle ngenqubo yakulesi sikole okubikwa ukuthi izingane zakhona zigcwala umgwaqo ngesikhathi sokufunda njengoba zisuke zixoshelwe ukufika emuva kwesikhathi.
Omunye umzali utshele ILANGA ukuthi ngoMsombuluko kakufundwanga esikoleni kuxoshwe inqwaba yezingane ngoba kuthiwa bezingekho ngosuku okuvalwe ngalo esikoleni ngenyanga edlule. Uthi babizwe esikoleni ekubeni kwabona othisha bebengekho ngalo lolu suku. Uveze nokuthi izingane eziningi kazisekho kulesi sikole, sezifunda kwezingomakhelwane.
“Izingane ziyafeyila ngoba kayikho imfundo. Uma ubheka nebhuku lengane lapho ibhalela khona, kakukho okukhombisa ukuthi uthisha uyawuhlola umsebenzi wayo nsuku zonke. Uma lina isuke igcagcele esokeni kothisha.
“Ngikhuluma nje izingane sezilinganiselwa ema-40 isikole sisonke,” kusho umzali. Uthi ngeke bathule konakala ngoba sekubonakele ukuthi isiphetho wukuba sivalwe isikole ngoba othisha abasele kabeqile kwabayisihlanu.
Uthi okubakhathaza kakhulu wukuthi nezingane ezihlala noninakhulu kazivunyelwe ukuya nabo uma zibizwe esikoleni, kufunwa abazali bazo uqobo.
"Kasikwazi ukubeka uvo lwethu esikoleni ngoba uthishanhloko uvele athi ngeke atshelwe ngabantu ukuthi isikole kumele asiphathe kanjani. Masingathwali icala lokuthi izingane kazisashaywa, zonke izinsuku sibizwa esikoleni, kakuhlukene nokuthi kushaywa thina manje,” kusho umzali.
Uthi okunye okuyinkinga kulesi sikole wukuthi kuxake isomiso, abafundi abaphuzi lutho ubusika nehlobo kuyazifanela kodwa amathangi akhona ngaphakathi. Ethintwa uthishanhloko wesikole, uMnu Sbusiso Nkosi, ukhale ngokuthi usaxinekile kodwa wathi abazali bayayazi imigudu efanele uma bengenelisekile ngaphambi kokuba udaba baludlulisele kwabezindaba.
Okhulumela uMnyango wezeMfundo KwaZulu-Natal, uMnu Kwazi Mthethwa, uthi kakulona icala ukubizwa komzali kodwa ukungafundi kwabafundi bayakugxeka kakhulu.
“Ungqongqoshe ufuna kufundwe ngaso sonke isikhathi kungabikhona umntwana ohleli ngaphandle ngesikhathi sokufunda. Sizoxhumana nabahloli ukuze lubhekisiswe udaba lwalesi sikole,” kusho uMnu Mthethwa.