Abangcwabi bahlele umjaho eMgungundlovu
INKAMPANI yabangcwabi ihlele umjaho webanga lika12km iCemetery to Cemetery (C2C) ezosukela emathuneni aseThembeni eLincon ngeSonto ngo-7 ekuseni usongwe kwawaseMountain Rise eMgungundlovu.
Lo mjaho uhlelwe iKhayelihle Funeral Services ngokubambisana neSpartan Athletics Club kanti isiqubulo sawo sithi “Sibathanda bephila”.
UThandiswa Zamisa weKhayelihle, uthi bahlose ukuthi lo mjaho ugijinywe minyaka yonke.
“Ezokugijima siyazikhuthaza kakhulu ngoba zigcina imizimba iphilile, yingakho nje sise- benzisana naneMandela Marathon, iMaritzburg Marathon neminye imijaho eminingi.
Umphakathi kumele wazi ukuthi umsebenzi wethu kakukhona nje ukungcwaba kuphela, sifisa nokuwugqugquzela ukuba uzinakekele kwazise ukuzivocavoca kwenza uphile kahle nezifo zingakungeni kalula,” kusho uThandiswa.
Imali yokujoyina ngu-R100 bese kuthi abangenawo amalayisensi bazojoyina ngo-R115. Ngolwazi ngalo mjaho kungashayelwa uThandiswa kwethi: 081 565 4501 noma uJohn Hall kwethi: 082 491 7679.
Kusenjalo, iPhoenix Villagers ihlele iCross Country ezokuba ngoMgqibelo ePhoe- nix enyakatho yeTheku. Le cross country yandulela eyokugcina ngaphambi kweKwaZulu-Natal Cross Country Championships ezokuba mhla zili-12 kwezokwethwasa eRichmond.
Umjaho weCross Country uzoqala ngo-11, abazokwenza kahle bazozibeka ethubeni lokumela isifundazwe kwekazwelonke ngoMandulo (September) eNorth West.
Le kilabhu izokuba neMandela Legacy Challenge 10km ehambisana no-5km fun run ngeSonto kusuka ngo-8 ekuseni eRydalvale Sports Ground, ePhoenix. Ngolwazi kushayelwa uDanny Chetty kwethi: 082 454 4073.