I-IRON DUKE ICASUKE YAJIKA ISINQUMO NGOMHLONGO
USIHLALO we-Orlando Pirates, uDkt Irvin “Iron Duke” Khoza ucasuke wasijika ngokushesha isinqumo sokusayina amasizini amathathu kukaBrighton Mhlongo ( osesithombeni) kwiChippa United njengoba sekuvela ukuthi usezohlala eyodwa nje kuphela.
USiviwe “Chippa” Mpengesi ongumnikazi weChippa umemezele emasontweni amabili adlule ukuthi usayinise uMhlongo inkontileka yeminyaka emithathu. Leli phephandaba lithole ukuthi uChippa lesi sivumelwano usiqedele nenye yamadodana kaKhoza. Kuthiwa uKhoza ubephesheya.
Nokho kuthiwa ngaphambi kokufulathela elakuleli wakubeka kwacaca ukuthi uMhlongo kumele abolekiswe isizini eyodwa kwiChippa.
Esebuyile eNingizimu Afrika ngoMsombuluko uDkt Khoza, kuthiwa uthukuthele wathelwa ngamanzi ezwa izindaba zokuthi uMhlongo usayiniswe yiChippa iminyaka emithathu. Kuthiwa umbizele eGauteng ukuzoxoxa naye ubuso nobuso.
Lo mdlali kuthiwa usuke ekhempini yeChippa eThekwini ngoLwesibili ekuseni ukuyohlangana nalesi sikhulu, wabuya ntambama. Kuthiwa lesi sikhulu simazisile ukuthi sisamdinga kwiPirates ngakho uzohlala isizini eyodwa kwiChippa hhayi amathathu.
Kuthiwa uMhlongo usezinikele ukuthi uzovusa ibhola lakhe ngokulwela ijezi kwiChilli Boys ngesizini ezayo. Lo mdlali uchithwe yiPirates ekubeni kunguyena obehamba phambili ngamavoti kule kilabhu ukuqala umdlalo weCarling Black Label Champions Cup. Umdlalo weCarling uzogijinywa yiBucs neKaizer Chiefs ngoMgqibelo ngo-15h00 eFNB Stadium, eGoli.
Kuthintwa uMike Makaab weProsport International okuyinkampani ephethe uMhlongo, uthe: “Ngingakuqinisekisa ukuthi uMhlongo uzodlala isizini kwiChippa United. Njengoba sikhuluma nje ujima neChippa eThekwini.”
Kuzo ezeChippa United, uDiamond Thopola oyisitobha uqokwe ukuba ngukaputeni wale kilabhu emuva kokujoyina amaBhakabhaka kukaThamsanqa “General” Sangweni obephethe lesi sikhundla.