Bayalwe ukulwela ibheji leChiefs
Uzimisele ngamagoli olambele uthando lwabalandeli
ULAMBELE amagoli azomsiza ukuzifaka ezinhliziyweni zabalandeli beKaizer Chiefs uJoseph “Tight” Molangoane oyisikhwishikhwishi sale kilabhu ezobhekana ne-Orlando Pirates koweCarling Black Label Champions Cup ngoMgqibelo ngo-15h00 eFNB Stadium, eGoli.
Ekhuluma neLANGA izolo ngoLwesithathu emini lo mdlali uthi kayikho into ayifisa njengokuboshelwa kulo mdlalo womkhaya azwakalise ukuthi uchazwa kakhulu yinhlokomo eyenzekayo nxa ebambe ibhola.
Uthi ufuna ukuphenduka umngani omkhulu wenethi okuzokwenza abalandeli bafe nakakhulu ngaye.
“Engikuqaphelile ngesizini edlule wukuthi kangizange ngenze kahle ikakhulukazi ekuhlohleni amathuba abengasiza ikilabhu yenze nakangcono. Kule sizini ngizimisele ngokwenyusa izinga lami ekuhlohleni amagoli. Ngisebenzela phezu kwalokho ejimini, ukungayibheki inethi.
“Sifuna ukuwunqoba kumnyama kubomvu lo mdlalo kwazise uzosifaka olukhulu ugqozi ngaphambi kokuqala kwesizini. Phela ukuwina umdlalo womkhaya kunyusa ukuzethemba,” kusho lo mdlali.
Uthi bayalwe nguSteve “Mphathi” Komphela, ongumqeqeshi weChiefs, ukuhlonipha abaqeqeshi bosuku kulo mdlalo baphinde baqikelele ukuthi bayawunqoba.
Lapha kuhlala ebhentshini abalandeli ababili bala makilabhu ababa nenhlanhla yokuqokwa ngenxa yokuvota kakhulu.
“Sifunda kuyona yonke imidlalo. Nakulona kuningi esizokufunda ngaphambi kokuqala kwesizini esizimisele ngokwenza kahle kakhulu kuyona. Sidonswe ngendlebe ukulwela ibheji leKaizer Chiefs kule sizini,” kusho uMolangoane abaningi abathi ubakhumbuza uJabu “Pule” Mahlangu.
Uthi ubheke ukuthi bangene khaxa abadlali abasanda kusayinwa yile kilabhu kubalwa uTeenage Hadebe noPhilani Zulu.
Nakuba bengavotelwanga abadlali abasha kodwa kulindeleke ukuba balithole ithuba ngesiwombe sesibili.
KwiPirates kubhekeke ukuba babonakale ukuthi baphetheni uThamsanqa “General” Sangweni noMusa Nyatama abadlala esiswini.
Laba badlali kubukeka bezokhipha ngesango u-Issa Sarr kule kilabhu uma engawanyusi amasokisi ngoba bayibamba endaweni yakhe.