KUSOLWA UMONA WABEBHOLA KUBHUNTSHA I-DBN U/19
KUSOLWA umhobholo kubanikazi bamakilabhu aKwaZulu-Natal ngokubhuntsha kweDurban U/19 International Tournament obekumele iqale namuhla ngoLwesine ezinkundleni ezahlukene zaseThekwini.
Kuthiwa kunesikhulu esidumile ebholeni lakulesi sifundazwe esenze konke okusemandleni aso ukuqinisekisa ukuthi kawuqhubeki lo mqhudelwano uma ingafakwa ikilabhu yaso.
Lesi sikhulu kuthiwa siqhosha ngokuthi basizwa ekhaleni uZandile Gumede oyiMeya ye- Theku noBongi Sithole-Moloi onguNgqongqoshe wezeMidlalo kulesi sifundazwe.
Kuthiwa ngemuva kokuba lesi sikhulu sesitsheliwe ukuthi ngeke yamukelwe ikilabhu yaso ngoba kumele kudlale amakilabhu ayisi8, abagqugquzeli bathole incwadi ebivela kuRohin Naidoo oyiNhloko yomnyango kaMoloi.
Le ncwadi kuthiwa ibikubeka kucace ukuthi lo mnyango uzokweseka le midlalo uma kuzofakwa amakilabhu ayisi-6 aKwaZulu-Natal agijima ngaphansi kwePremier Soccer League (PSL). La makilabhu yiMaritzburg United (ebivele ifakiwe), yiLamontville Golden Arrows (ebifakiwe ngonyaka odlule), AmaZulu FC, iThanda Royal Zulu (esidayiselwe AmaZulu FC), iReal Kings United neRoyal Eagles. Le ncwadi ithunyelwe mhla zili-15 kuNhlaba (May) kophezulu.
Abagqugquzeli babe sebenxusa iSouth African Football Association (Safa) ukuba ingenelele ngoba bese kucaca ukuthi lesi siphakamiso somnyango kuhloswe ngaso ukubhuntshisa imidlalo njengoba kwaziwa ukuthi kumele kudlale amakilabhu ayisi-8 kuphela. ISafa yiyona elawula unobhutshuzwayo eNingizimu Afrika.
UDennis Mumble oyisikhulu esiphezulu kwiSafa, ubhalele uNaidoo incwadi mhla zingama26 kuNhlangulana (June) encenga umnyango ukuhoxisa lesi siphakamiso. Kule ncwadi kuyavela ukuthi abagqugquzeli bake bathola ucingo ehhovisi likaMoloi lucacisa ukuthi ngeke iqhubeke imidlalo uma ingekho ikilabhu ethile (egagulwe ngegama).
ILANGA linawo wonke amakhophi alezi zincwadi njengoba liwapotshozelwe wumthombo walo oncikene kakhulu nalolu daba. Kuthiwa okunye okubhuntshise le midlalo wukuthi esinye isikhulu sebhola besifuna ukunikwa ngenkani umsebenzi ka-R800 000 wokuthutha abadlali ngamabhasi.
UGugu Marawa ongomunye wabagqugquzeli bale midlalo, ukuqinisekisile kuleli phephandaba ukuthi kayisekho imidlalo. Uthe kuningi okwenzekile okuholele ekutheni kubhuntshe lo mqhudelwano. Nokho wenqabile ukudalula okuningi ezeseka ngokuthi vele le midlalo seyibhuntshile, kakukho okusazojika. Akafunanga nokuphika kumbe aqinisekise lezi zizathu ezingenhla emi kwelokuthi le midlalo isibhuntshile.