UBONA IBAFANA IZONGENA KALULA KWEYOMHLABA NGO-BAXTER
UTHABO Senong, oyiphini likaStuart Baxter ongumqeqeshi weBafana Bafana, uthi lesi sikwati sisazozuza lukhulu ngaphansi kwalo mqeqeshi odabuka e-England.
USenong ubexoxa nabezindaba izolo ngoLwesithathu emini ngesikhathi kuqhubeka imidlalo yeSAB U/21 League National Championship eqale ngoLwesibili eNike Football Training Centre, eSoweto. Le midlalo isongwa ngeSonto. USenong uthi yize esasebenze isikhathi esincane noBaxter kodwa kuningi asekufunde kuyena.
“UBaxter uzosinika lokhu esikudingayo siyiNingizimu Afrika. Uyakwazi ukuhlelela izitha futhi uyakwazi ukuhlola uhlobo lwabadlali anabo ukuze abone ukuthi kumele abasebenzise kanjani. Ngiwabona emakhulu amathuba okuthi iBafana ingene kwi-African Cup of Nations eCameroon nakwiNdebe yoMhlaba ngonyaka ozayo eRussia,” kusho uSenong owalile uku- phawula ngokuqashwa ngokugcwele kwesekela likaBaxter.
Uncome kakhulu uhlelo lweSAB neSouth African Football Association (Safa) lokuhlelela abaqeqeshi izifundo zokuqeqesha ebeziseHigh Performance Centre ezinyangeni ezimbalwa ezedlule. Naye uSenong ufikile kulezi zifundo ebezihanjelwe ngabaqeqeshi bamakilabhu eSAB League abebeqhamuka kuzona zonke izifunda zeSafa.
“Bonke abaqeqeshi abakule midlalo banezitifiketi. Abadlali bayakhombisa ukuthi bacijwa ngabantu asebenolwazi oluthuthukile,” kusho uSenong oyibambe noHelman Mkhalele noOwen Da Gama ukuhlonza abadlali kulo mqhudelwano. NgeSonto kuzomenyezelwa abadlali abangama-25 abazohlelelwa ikhempu ukuze bakhule ndawonye.
Le midlalo ihanjelwe nanguTim Sukazi obematasa efuna abadlali abazongena ngaphansi kwesitebela sakhe njengoba eyimenenja yabadlali.